TAQSIṬ TIS 92

Ɛisa yeḥya-​d lmeggtin

TAQCICT i teţwaliḍ dagi tesɛa 12 iseggasen di leɛmeṛ-​is. Ɛisa iṭṭef-​as afus ma d imawlan-​is atnan ɣer tama-​ines. Teẓriḍ ayɣer i feṛḥen ayendin? D ayen ara nwali tura.

Baba-​s n teqcict-​agi isem-​is Jayṛus; d argaz mechuṛen aṭas. Yiwen wass tehlek yelli-​s, dɣa segnen-​ţ deg wusu. Lameɛna teggumma aţ-​ţeḥlu, lehlak-​is iţzid deg-​s irennu. Imawlan-​is ikcem-​iten uɣilif d ameqran axaṭer yelli-​tsen aţţan la teţmeţţat, yerna siwa neţţat i sɛan. Yuɣ lḥal Jayṛus yesla s lbeṛhanat i gxeddem Ɛisa, dɣa iṛuḥ a t-​id-​yawi.

Mi gelḥeq Jayṛus ɣer wemkan anda yella Ɛisa, yufa aṭas n lɣaci i s-​d-​izzin. Lameɛna iddhem ger lɣaci-​yagi, yeɣli ɣer iḍarren n Ɛisa, yeţḥellil deg-​s: ‘Aţţan la teţmeţţat yelli. Di leɛnaya-​k, ddu yid-​i iwakken a ţ-​tesseḥluḍ.’ Ɛisa ikker, yedda yid-​es.

M’akken i leḥḥun, lɣaci ḥerṣen Ɛisa si mkul lǧiha. Di teswiɛt kan Ɛisa yeḥbes tikli. Yeḍleb i lɣaci: ‘Anwa i yi-​d-​innulen?’ Ɛisa ifaq belli yella win i t-​id-​yennulen axaṭer iḥuss i yiwet n tezmert i geffɣen seg-​s. Lameɛna anwa i t-​id-​imusan? D yiwet n tmeṭṭut i geṭṭef lehlak 12 iseggasen aya. Tameṭṭut-​agi tqerreb ɣer Ɛisa, dɣa tennul acḍaḍ n ujellab-​is. Din din teḥla seg waṭan-​is!

Ul n Jayṛus yethedden mi gwala lbeṛhan-​agi axaṭer yefhem belli yeshel-​as i Ɛisa ad yesseḥlu albeɛḍ. Lameɛna, ataya yiwen wergaz, yewwi-​yas-​d lexbaṛ-​agi: ‘Ur sɛeţţib ara akteṛ Ɛisa, yelli-​k temmut.’ Mi gesla Ɛisa i imeslayen-​agi, yenna i Jayṛus: ‘Ur ţţagad ara, ala asellek ara tsellek yelli-​k!’

Mi wwḍen ɣer wexxam n Jayṛus, ufan lɣaci ţmeǧǧiden fell-​as. Lameɛna Ɛisa yenna-​yasen: ‘Ḥebset imeṭṭawen. Taqcict-​nni ur temmut ara. D iḍeṣ kan i teṭṭeṣ.’ Lameɛna nutni bdan ţmesxiṛen fell-​as axaṭer ẓran belli temmut.

Ɛisa yewwi imawlan n teqcict-​nni akk-​d tlata seg yemceggɛen-​is ɣer texxamt anda i teẓẓel. Mbeɛd yeṭṭef-​iţ seg ufus, yenna-​yas: ‘Kker!’ Din din teḥya-​d si lmut, akken i teţwaliḍ dagi. Tekker s ibeddi, dɣa tebda tleḥḥu! Ɣef wannect-​a i llan imawlan-​is di sseɛd. Ih, yeǧǧuǧeg lfeṛḥ deg wulawen-​nsen.

Taqcict-​a mačči d lɛebd amezwaru i d-​yeḥya Ɛisa. Adlis Iqedsen inna-​d belli d mmi-​s n yiwet n taǧǧalt izedɣen di temdint n Naɛin. Mbeɛd, Ɛisa iḥya-​d Laɛẓar, gma-​s n Meryem d Marṭa. Asm’ara yili Ɛisa d agellid, a d-​yerr aṭas aṭas n lɣaci ɣer tudert. Mačči d ayen issefṛaḥen?

Luqa 8:40-56; 7:11-17; Yuḥenna 11:17-44.