NDAI sumla kaw e nanhte mu ai numsha a asak 12 ning rai sai. Yesu gaw shi a lata hta jum nga ai. Shi a kanu yan kawa gaw makau e, tsap nga ai. Shan hpa majaw dai daram kabu nga ma ai hpe chye a ni? yu yu ga.

Numsha a kawa gaw Ya-iru ngu ai ahkyak kaba ai masha langai mi re. Lani mi hta e, shi a kasha machyi nna yup ra kaw galeng tawn ai. Raitimung numsha gaw machyi bran wa ai lam nnga ai. Grau nna machyi kaba sawng wa ai. Ya-iru hte shi a madu jan grai myit ru nga ma ai. Shan a kasha si wa na zawn rai nga ai. Dai numsha gaw shan a shayi sha shing tai re. Dai re ai majaw Ya-iru gaw Yesu hpe sa shaga ai. Yesu gaw lamik kumla amyu myu madun dan lu ai lam na ai majaw sa shaga ai.

Ya-iru gaw Yesu hpe mu ai shaloi, shi a makau e masha law law shing grup nga ma ai. Raitimung Ya-iru gaw masha hpung kaang de du hkra sa nna Yesu a lagaw nhpang e ding nyawm ai. ‘Nye a shayi sha gaw grai machyi nga ai. Chyeju hte ngai kaw hkan nang nna, nye a kasha hpe shamai ya rit,’ nga nna tsun ai. Yesu gaw ‘ngai sa wa na nngai,’ nga nna tsun dat ai.

Shan lahkawng lam hkawm wa ai shaloi, masha wunawng hpung ni gaw makau e grau nna sit shani sa wa ma ai. Dai shaloi Yesu gaw akajawng sha hkring tsap dat ai. ‘Ngai hpe ahtawk ai kadai rai ta?’ nga nna san dat ai. Shi kaw na atsam pru mat wa ai hpe Yesu chye kau dat ai. Dai rai nna shi hpe masha langai ngai ahtawk hkra sai, ngu ai hpe chye kau ai. Kadai ahtawk dat a ni? 12 ning tup machyi nga ai num langai mi re. Yesu a makau de sit sa nna Yesu a palawng hpe ahtawk dat ai hte shi a ana mai sai mat ai.

Ya-iru gaw dai hpe mu jang grau nna myit kam mat ai. Hpa majaw nga yang Yesu gaw masha ni hpe aloi sha tsi shamai ya lu ai lam hpe shi mu ai. Raitimung dai aten e shi ga shana ai masha langai mi du wa ai. ‘Yesu hpe hkum shatsang jat nga sa, na a kasha si mat sai,’ nga nna Ya-iru hpe tsun ai. Yesu gaw dai ga hpe na jang Ya-iru hpe tsun ai. ‘Hkum myit ru, na a shayi sha bai kaja wa na re,’ nga nna tsun dat ai.

Dai hpang e Ya-iru nta de du wa ai shaloi, masha ni grai yawn nna hkrap nga ma ai. Raitimung Yesu gaw: ‘Hkum hkrap mu, ma kaji nsi ai, yup taw nga ai,’ nga nna tsun ai. Raitimung shanhte gaw mani nna Yesu hpe jahpoi asawng nga ma ai. Hpa majaw nga yang numsha si mat sai hpe shanhte chye ai.

Dai shaloi Yesu gaw numsha a kanu yan kawa hte, shi a sape masum hpe shaga la nna numsha taw nga ai gawk kata de shang sa wa ma ai. Numsha a lata hpe jum nna: ‘Rawt u,’ nga nna tsun dat ai. Dai shaloi numsha gaw asak bai hkrung wa ai. Ndai sumla hta mu ai hte maren re. Dai hpang rawt nna lam hkawm ai. Dai majaw shi a kanu yan kawa grai kabu nga ma ai.

Yesu si ai masha ni hpe asak bai jahkrung ya ai hta, ndai numsha hpe shawng sharawt ai nre. Na-in mare na gaida jan a shadang sha hpe shawng sharawt ya ai re, nga nna Chyum Lai ka hta tsun ai. Dai hpang e Yesu gaw Mari hte Marhta a kayung Larazu hpe asak jahkrung ya ai. Karai Kasang dang da ai hkawhkam hku nna Yesu up hkang ai aten hta, si mat wa ai masha law law asak bai hkrung wa na ma ai. Ndai lam a majaw kabu shara n re ni?