Ngewa ya 92: Yesũ Aithayũũkya Akw’ũ
KELĨTU kaa ũkw’ona vaa kena ũkũũ wa myaka 12. Yesũ akakwete kw’oko, na inyia na ĩthe wako maũngamĩte vau ũtee. We nĩwĩsĩ matanĩtw’e nĩ kyaũ? Ekai twone.
Ĩthe wa kelĩtu kau aĩ mũndũ wa vata mũno weetawa Yailu. Mũthenya ũmwe kelĩtu kake nĩkawaie, na kakomw’a kĩtandanĩ. Ĩndĩ kayaaĩw’a nesa. Kaendeeie o na kwĩw’ĩĩa naĩ. Yailu na mũka wake maĩ na kĩũũyũ mũno, nũndũ kelĩtu koo koonekaa ta keũkw’a. Na noko kelĩtu koo ke o kamwe. Kwoou Yailu athi kũmũmantha Yesũ. Nĩweew’ĩte ĩũlũ wa syama ila Yesũ weekaa.
Yĩla Yailu wamwonie Yesũ, we athyũlũlũkĩtwe nĩ andũ aingĩ mũno. Ĩndĩ Yailu avĩtĩla andũnĩ asu katĩ na avalũka maaũnĩ ma Yesũ. Na amwĩa: ‘Mwĩĩtu wakwa nĩ mũwau mũno vyũ. Nĩngũkwĩsũva ũka ũmũvosye.’ Na Yesũ amwĩa nĩngũka.
Na maendete, andũ maendee o na kũsukumana mamũthengee. Na kwa mĩtũkĩ Yesũ aũngama na akũlya: ‘Nũũ ũla wangiita.’ Yesu eewie aumwa nĩ vinya, kwoou nĩweesĩ kana ve mũndũ wamũkiita. Ĩndĩ nũũ? Nĩ mũndũ mũka watwĩe e mũwau kwa ĩvinda ya myaka 12. We ookie akiita ngũa sya Yesũ, na avow’a.
Ũu watumie Yailu ew’a nesa, nũndũ aĩ atonya kwona kana nĩ ũndũ ũvũthũ mũno kwa Yesũ kũvosya mũndũ. Ĩndĩ kavinda o kau mũtũmwa ooka na amwĩa Yailu, ‘Manya kũnyamasya Yesũ mbee wa vau. Mwĩĩtu waku nĩwakw’a.’ Yĩla Yesũ weewie ũu eea Yailu: ‘Ndũkakĩe, nũnũũvoa.
Na ĩndĩ mavika nyũmbanĩ ya Yailu, andũ maendee o na kũĩa na kyeva kingĩ. Ĩndĩ Yesu amea: ‘Ekai kũĩa. Kana ti kakw’ũ. Kakitĩte ũkoma.’ Ĩndĩ mamũthekeea nũndũ nĩmeesĩ kana kau nĩ kakw’ũ.
Yesũ ĩndĩ oosa ĩthe na inyia wa kelĩtu kau, na atũmwa atatũ na malika kasũmbanĩ kala a kana kakomete. Na Yesũ akakwata kw’oko na asya: ‘Ũkĩla!’ Na keethĩwa thayũ ĩngĩ o tondũ ũtonya kwona vaa. Nako kookĩla na kambĩĩa kũthi kũũ na kũũ! Kĩu nĩkyo kĩtumi inyia na ĩthe wako matanĩte mũno vyũ.
Ũũ tiwe mũndũ wa mbee kũthayũũkw’a nĩ Yesũ. Wa mbee ũla Mbivilia ĩwetaa ĩũlũ wake nĩ mwana wa kĩveti ndiwa ndũanĩ ya Naini. Ĩtina, Yesũ nĩwathayũũkisye Lasalo, mwana-a-inyia wa Meli na Matha. Yĩla Yesũ ũkasumbĩka ta mũsũmbĩ wiĩtwe nĩ Ngai, akathayũũkya andũ aingĩ mũno vyũ. Ũsu w’o tyo ũndũ waĩlĩte kũtanĩthya?
Luka 8:40-56; 7:11-17; Yoana 11:17-44.
Makũlyo
- Ĩthe wa kelĩtu kaa ke visanĩ eetawa ata, na nĩkĩ we na mũka wake maĩ na kĩũũyũ mũno?
- Yailu eekie ata yĩla wamwonie Yesũ?
- Kweethĩiwe ata yĩla Yesũ waendete mũsyĩ kwa Yailu, nake Yailu akwatie ũtũmani mwaũ e nzĩanĩ?
- Nĩkĩ andũ ala maĩ nyũmbanĩ kwa Yailu mamũthekeeie Yesũ?
- Yesũ eekie ata ĩtina wa kũlika kasũmbanĩ ka kelĩtu vamwe na atũmwa atatũ na ĩthe na inyia wako?
- Nũũ ũngĩ Yesũ wamũthayũũkisye, na ũu wĩonany’a ata?
Makũlyo ma kwongeleela
- Soma Luka 8:40-56.
Yesũ oonanisye ata kana aĩ na tei na nĩwamũeleiwe mũndũ mũka ũla waumawa nĩ nthakame, namo atumĩa ma Kĩkundi ũmũnthĩ matonya kwĩmanyĩsya kyaũ kũmana na ũndũ ũsu? (Lk. 8:43, 44, 47, 48; Ali. 15:25-27; Mt. 9:12, 13; Ako. 3:12-14)
- Soma Luka 7:11-17.
Ala makw’ĩĩwe nĩ endwa moo matonya ata kũkwata ũkiakisyo mũnene kumana na ũndũ Yesũ weekĩie kĩla kĩveti ndiwa kya Naini? (Lk. 7:13; 2 Ako. 1:3, 4; Aevl. 4:15)
- Soma Yoana 11:17-44.
Yesũ oonanisye ata kana nũndũ waĩle kwĩw’a kyeva ĩũlũ wa kĩkw’ũ kya mwendwa wa mũndũ? (Yoa. 11:33-36, 38; 2 Sam. 18:33; 19:1-4)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Yesũ Nĩwathayũũkisye Kelĩtu Kanini!
Andũ nĩmamũthekeeie Yesũ yĩla waisye kelĩtu kala kaĩ kakw’ũ nĩkakomete. Nĩ ũndũ mwaũ weesĩ andũ asu matawĩsĩ?
YESŨ NĨWE NZĨA, NĨWE W’O, NĨWE THAYŨ
Yesũ Nĩwathayũũkisye Mwanake wa Kĩveti Ndiwa
Andũ ala moonie kyama kĩu nĩmamanyie ũndũ wa vata.
YESŨ NĨWE NZĨA, NĨWE W’O, NĨWE THAYŨ
Kũthayũũkw’a kwa Lasalo
Ve maũndũ elĩ ala matumie andũ ala mamũvĩngaa Yesũ matakaĩa kana Yesũ nĩweeka kyama.
