МЫ ХЪЫДЖЭБЗ цІыкІур илъэс 12 мэхъу. Абы и Іэр зыІыгъыр Хьисэщ, къыбгъэдэтхэр хъыджэбз цІыкІум и адэмрэ и анэмрэщ. ПщІэрэ ахэр апхуэдизу щІэгуфІэр сытми? ИІэт къэтщІэнти.

Мы хъыджэбз цІыкІум и адэр цІыху цІэрыІуэщ. Абы и цІэр Иаирщ. Зэгуэр хъыджэбз цІыкІур сымаджэ хъури пІэхэнэ хъуащ. Арати, нэхъ хьэлъэ хъууэрэ кІуэт, хъужтэкъым. Иаиррэ и фызымрэ Іейуэ мэгузавэ, хъыджэбз цІыкІур лІэну хьэлъэщи. А зыпхъу закъуэращ абыхэм яІэр. ИтІанэ, Иаир йожьэ Хьисэ къилъыхъуэну. ИпэІуэкІэ абы зэхихат Хьисэ ищІа Іуэху телъыджэхэр.

ЦІыху гупышхуэм къаухъуреихьауэ щыту Хьисэ абы къегъуэт. А цІыху гупышхуэм хокІри ар Хьисэ и пащхьэм йотІысхьэр. Лъэгуажьэмыщхьэу щыту ар абы йолъэІу: «КхъыІэ, накІуи си пхъур сымаджэщи схуэгъэхъуж»,— жеІэри. Арати, Хьисэ арэзы мэхъу.

Здежьам цІыхухэм нэхъ Іеижу къаухъуреихьын щІадзэ. Арати, Хьисэ къоувыІэри и хъуреягъкІэ зыкъеплъыхь. «Хэт къызэІусар?»,— жеІэр абы. Къару зэрыхэкІар зэхищІати, зыгуэр къызэреІусар къыгурыІуауэ аращ. Хэту пІэрэ еІусар? Илъэс 12 хъуауэ цІыхубз сымаджэ хьэлъэ гуэрт ар. Ар Хьисэ бгъэдыхьэу и щыгъыным зэреІусэу хъужащ!

Иаир и гур нэхъ мэпсэхуж, Хьисэ цІыхухэр тыншу зэригъэхъужыфыр къилъэгъуа нэужь. Абы хэту хъыбар къехьри зыгуэр къокІуэ. КъэкІуар Иаир йолъэІу: «УмыгъэпІейтей афІэкІа Хьисэ. Уи пхъур лІакІэщ»,— жеІэри. Абы жиІам емыплъу Хьисэ Иаир зыхуегъазэ: «Умыгузавэ, псори тэмэм хъужынущ»,— жеІэри.

Иаир деж къызэрысыжу ахэр къыІуощІэ зызыфыщІыжу гъы цІыхухэм. Арати, Хьисэ яжреІэ абыхэм: «Фымыгъ, сабийр лІакъым. Ар жейуэ аращ»,— жеІэри. Ауэ ахэр Хьисэ къыщодыхьэшх, сабийр зэрылІар ялъагъури.

Абы иужькІэ лІар зыщІэлъ пэшым Хьисэ щІохьэр, сабийм и адэ–анэмрэ апостолищрэ и гъусэу. Арати, хъыджэбз цІыкІум и Іэр къещтэри: «Къэтэдж!»,— жеІэри унафэ хуещІ. Зэрыплъагъущи, хъыджэбз цІыкІур къохъуж. Ар къотэджри пэшым къыщекІухь! Аращ абы и адэмрэ и анэмрэ апхуэдизу щІэгуфІэр.

Хьисэ япэу аракъым къигъэхъужар. Библием зэритымкІэ япэу къигъэхъужар Наин къалэм щыщ фызабэм и къуэращ. ИтІанэ Хьисэ апхуэдэуи къигъэхъужащ Мэремрэ Марфэрэ я дэлъху Лазарь. Алыхьым тригъэува пащтыхьу Хьисэ унафэ ищІын щІидза нэужь, цІыху куэд абы къигъэхъужынущ. ГуфІэгъуэшхуэкъэ–тІэ ар?