GAKA kairĩtu ũrona haha nĩ ka miaka 12. Jesu akanyitĩte guoko, na nyina na ithe marũgamĩte hakuhĩ nako. Wee-rĩ, no ũmenye nĩkĩ gĩtũmĩte makene ũguo? Ta reke tuone.

Ithe wa kairĩtu eetagwo Jairũ mũndũ waarĩ igweta. Mũthenya ũmwe mwarĩ nĩ aarũarire na agĩkomio ũrĩrĩ. No ĩndĩ ndaigana kũigua wega. Aakĩrĩrĩirie o kũrũara. Jairũ na mũtumia wake makĩnyitwo nĩ kĩeha mũno, tondũ kuonekaga ta kairĩtu kau nĩ gegũkua. Kairĩtu kau kaarĩ ka mũmwe. Rĩu Jairũ agĩgĩthiĩ gwetha Jesu. Nĩ aakoretwo aiguĩte ũhoro wa ciama iria ciaringagwo nĩ Jesu.

Rĩrĩa Jairũ onire Jesu-rĩ, kwarĩ na kĩrĩndĩ kĩnene kĩamũrigicĩirie. Jairũ nĩ aahotire kũhĩtũkĩra gatagatĩ-inĩ ga kĩrĩndĩ kĩu na akĩgũithia magũrũ-inĩ ma Jesu. Akĩmwĩra atĩrĩ, ‘Kairĩtu gakwa nĩ karũaru mũno. Wenda ũka ũkahonie.’ Jesu aamwĩrire nĩ megũthiĩ hamwe.

Me njĩra-inĩ magĩthiĩ, kĩrĩndĩ gĩgĩthiĩ na mbere kĩmũkuhĩhĩrie. O rĩmwe Jesu akĩrũgama. Akĩũria atĩrĩ, ‘Nũũ wahutia?’ Jesu nĩ aiguire oimwo nĩ hinya, na kwoguo nĩ aamenyete nĩ haarĩ mũndũ wamũhutĩtie. No aarĩ ũ? Aarĩ mũtumia wakoretwo arĩ mũrũaru mũno kahinda ka mĩaka 12. Okire na akĩhutia nguo cia Jesu, o kahinda kau akĩhona!

Ũndũ ũyũ nĩ watũmire Jairũ aigue akenete, tondũ nĩ onire ũrĩa arĩ ũhũthũ harĩ Jesu kũhonia mũndũ. No rĩu ningĩ mũrehi wa ndũmĩrĩri agĩũka. Agĩkĩra Jairũ atĩrĩ, ‘Tiga gũtanga Jesu rĩngĩ. Mwarĩguo nĩarĩkĩtie gũkua.’ Jesu aigua makĩaria akĩĩra Jairũ atĩrĩ: ‘Tiga gwĩtigĩra, nĩekũhona.’

Mũthiainĩ maakinya nyũmba ya Jairũ, magĩkora andũ makĩrĩra me na kĩeha kĩnene. Na rĩu Jesu akĩmera: ‘Tigai kũrĩra. Mwana ti mũkuũ. No gũkoma akomete toro.’ Nao makĩmũthekerera, tondũ nĩ moĩ atĩ nĩ mũkuũ.

Jesu akĩoya ithe na nyina wa kairĩtu na atũmwo ake atatũ magĩtonya harĩa mwana aakometio. Agĩkĩmũnyita guoko akiuga atĩrĩ: ‘Ũkĩra!’ Gagĩcokwo nĩ muoyo wako, ta ũrĩa ũrona mbica-inĩ. Nako gagĩũkĩra na gakĩambĩrĩria gũthiĩ! Nĩkĩo nyina na ithe marĩ na gĩkeno gĩkĩru.

Ũyũ tiwe mũndũ wa mbere kũriũkio nĩ Jesu. Biblia ĩtwĩraga wa mbere aarĩ mũriũ wa mũtumia wa ndigwa watũũraga itũũra-inĩ rĩa Naini. Thutha ũcio, Jesu akĩriũkia Lazaro, mũrũ wa nyina na Mariamu na Maritha, kuuma kũrĩ akuũ. Hĩndĩ ĩrĩa Jesu agakorũo agĩathana e mũthamaki wa Ngai, nĩ akahota kũriũkia andũ aingĩ mũno mũno macoke muoyo rĩngĩ. Na githĩ tũtigũgĩkenio mũno nĩ ũhoro ũcio?