Esimwititi 92: Jesus ta pindura vafe
MUKADONA ogu ono kumona apa gonomvhura 12. Jesus kuna kwaterere kuwoko kwendi, ano ozina noguhwe kuna sikama popepi. Ono diva asi morwasinke vana hafere ngoso unene? Tu tareni si.
Oguhwe womukadona ogu mugara gomulyo gedina Jairusa. Ezuva limwe munwendi ta vere, makura tava mu rangeke pombete. Nye kapi ana kulizuvha ko nawa. Uvera wendi tau didi tupu unene. Jairusa namukadendi vana kara nosinka sosinene, morwa kuna kumoneka asi kakadona kawo taka fu. Age munwawo gelike gomukadona. Jairusamakura ta zi a ka papare Jesus. Age kwa zuvhire yitetu eyi ga rugene Jesus.
Jairusa apa ana gwanekere naJesus, age zina mu kundurukida mbunga zonene. Nye Jairusa ta piti mombunga omo noku ka ligandera konompadi daJesus. Ta tanta asi: ‘Munwange kuna kuvera unene-nene.’ Ta likwambere asi: ‘Nina kanderere, wiza o ya mu verure.’ Jesus ta tanta asi na wiza.
Ngomu vana kugenda, mbunga tazi lisindaike zi hede pepi. Haruka ko tupu, Jesus ta sikama. Ta pura asi: ‘Yilye ogu ana gumu nge?’ Jesus ta lizuvhu asi nonkondo dina tundu mo mwendi, yiyo ana diva asi kweli ogu ana mu gumu. Nye yilye? Kuna kara mukadi ogu nga vere unene nomvhura 12. Age kuna wiza nokuguma yikoverero yaJesus, makura yiyo ana veruka!
Eyi tayi ninkisa Jairusa a lizuvhe ko hansa, morwa ana mono asi ngapi omu ya rerupa Jesus mokuhakura muntu. Nye makura tapa wiza mutumwa. Ta tantere Jairusa asi: ‘Neisi no hepera kupura Jesus hena. Munoge ana fu.’ Jesus ta yi zuvhu eyi makura ta tantere Jairusa asi: ‘Gwa ha ku pwaga, na kara muwaawa.’
Apa vana ya siki kembo lyaJairusa, vantu awo kuna kulira noruguwo rorunene. Nye Jesus ta tanta asi: ‘Mwa ha lira. Munona kapi ana fu. Age kuna rara tupu.’ Nye awo tava zoro nokuswaura Jesus, morwa vana diva asi ana fu.
Jesus makura ta twara oguhya nozina womunona ntani novapositoli vendi vatatu monzugo ezi ana rara munona. Ta mu kwata kewoko nokutanta asi: ‘Pinduka!’ Makura ta paruka, ngomu tupu ono kuyimona apa. Makura ta pinduka nokugendagura! Eyi yiyo nye vana hafere ngesi unene oguhwe nozina.
Ogu kapisi yige muntu gokuhova ogu ga pindwire Jesus koufe. Bibeli kwa tanta asi gokuhova munwagara gomufisayendi ogu ga tunga mositata saNayini. Konyima, Jesus ta ya pindura hena Rasarusa, mpanza goMariya naMalita, koufe. Apa nga pangera Jesus ngahompa gwaKarunga, age nga ka reta vantu wovanzi ava va fa komwenyo. Nani eyi kapi tayi tu hafesa?
Rukasa 8:40-56; 7:11-17; Johanesa 11:17-44.
Mapuro
- Yilye oguhwe wogo mukadona mefano, ntani morwasinke vana karere mugara namukadendi nosinka sosinene?
- Yinke ana rugana Jairusa apa ana gwanekere naJesus?
- Yinke yina horoka apa ana kuza Jesus membo lyaJairusa, ntani mbudi musinke ana kugwana Jairusa monzira?
- Vantu vemembo lyaJairusa, morwasinke vana kuzorera Jesus?
- Yinke ana rugana Jesus, konyima zokutwara vapositoli vatatu noguhya ntani nozina womunona monzugo zomunona?
- Wolye hena ga pindura Jesus koufe, ntani yinke ayi likida eyi?
Mapuro gokugwederera ko
- Resa Rukasa 8:40-56.
Ngapi omu ga likidire Jesus nkenda nelituromo komukadi ogu nga vere madambwe ntani yinke nava vhura kulirongera ko kweyi vakuronambungakriste naina?
- Resa Rukasa 7:11-17.
Owo va zumbanesa vahali vawo monomfa, morwasinke nava vhulira kugwana ehengagwido lyenene melimbururo lyaJesus komufisayendi gomoNayini?
- Resa Johanesa 11:17-44.
Ngapi omu ga yi likidire Jesus asi yawapa kulira nomfa domuhali?
