Icisimicisyo 92: BaYesu Babusya Abafwile
MOYE ulukubona pano ali ne myaka ya kufyalwa 12. BaYesu balimwikete ku minwe yakwe, kabili bawisi na banyina balimakene apepi. Kani waisiba umulandu balukubonekela abasangalele? Leka tufwailisye.
Wisi wa mwano’mwanakasi mwalalume umucindeme uwe sina lya Jailo. Kambi kasuba umwana wakwe umwanakasi alwala, kabili bamubika pa bulo. Pano talukupolapo neli panini. Umukunda ulukukulilako lukoso. Jailo ne mukasi wakwe babombomana, pakuti cilukuboneka koti umwana wabo umwanice alukufwa. Emwano’mwanakasi bakwete lukoso. Popele Jailo aya mu kufwaya baYesu. Alyumfwile pa fimpelampela baYesu bacita.
Jailo asangana baYesu, kuli ibumba ilikulu ilya bantu ilibasingulukile. Pano apita mu bantu kabili ne kuwila pa makasa pali baYesu. Alabila ati: ‘Umwana wanji umwanakasi mulwasi ukwakuti.’ Abalomba ati: ‘Ndukumukombeteleni ati mwise mumuposye.’ BaYesu balabila ati ndukwisa.
Ili balukwenda, ibumba lilukubasininkisya ku kufwaya ukupalamina. Koti nififi baYesu baimakana. Baipusya ati: ‘Mba ninani uwankumya?’ BaYesu baomfwa ati amakosa afuma muli bo, baisiba ukweba’ti umo abakumya. Pano mba ninani? Umwanakasi uwali umulwasi pa myaka 12. Alisile ne kukumya ku mwinjila wa baYesu, kabili alipolele!
Ici calenga Jailo ukumfwako bwino, pakuti abona ifi cipubile kuli baYesu ukuposyo’muntu. Pano kwaise’ntumi kuli ye. Kabili yamubula Jailo ati: ‘Wilukukatasya baYesu. Umwana wobe afwa.’ BaYesu baumfwa ne kulabila kuli Jailo ati: ‘Wibombomana, penka akubusiwa.’
Ili mukupelako bafika ku ŋanda kuli Jailo, abantu balukulila kabili bali ne kubombomana ukukulu. Pano baYesu balabila ati: ‘Mwilukulila. Pakuti tafwilepo umwana. Alilele lukoso.’ Pano babaseka ne kulukubapufya baYesu, nipakuti baisiba ati afwa.
BaYesu bapinta bawisi na banyina ba mwanice kabili na botatu pa basambile babo mu cipinda umwalele umwanice. Nabo bamwikata ku minwe kabili ne kulabila ati: ‘Buuka!’ Kabili naye alibukule koti nififi ulukubona apa. Kabili alimine ne kulukwendaenda! Emulandu banyina na bawisi basangalalila ukwakuti.
Uyu talipo e muntu wa kutanga baYesu babusya ukufuma ku bafwile. Uwa kutanga Baibolo ilatubula ati mwano’mwalalume wakwe mukamfwilwe uwa mu musi wa Naini. Panuma, baYesu balibusisye Lasalo, indume yakwe Maliya na Malita, ukufuma ku bafwile. Ili baYesu bakateka koti ni mfumu ya baLesa, bakabusya abantu abafwile abakuti ubwingi. Kani tekuti tube ne kusangalala pali cico?
Luku 8:40-56; 7:11-17; Yoane 11:17-44.
Ifyakwipusya
- Mba bawisi moye uuli mu cikope nibani, kabili nindo bo ne bakasi babo babombomanina?
- Mba cindo Jailo acita ili asangana baYesu?
- Findo fyacitika ili baYesu balukuya ku ŋanda yakwe Jailo, kabili yesa masiwi Jailo apokelela ili balukuya?
- Mba nindo abantu mu ŋanda yakwe Jailo babasekela baYesu?
- Ili bapinta intangisi syotatu na bawisi na banyina mu cipinda cakwe moye, baYesu bacite’ndo?
- Mba nibani bambi baYesu babusisye ku bafwile, kabili ici cilatubule’ndo
Ifyakwipusya na fimbi
- Pendeni Luku 8:40-56.
Mba baYesu balilangile syani inkumbu ne milangwe iyelelwe ku mwanakasi uwalukuswa umulopa, kabili baeluda ba buKlistu muli bulelo koti batuntululako indo kuli cici? (Luku 8:43, 44, 47, 48; Lef. 15:25-27; Mat. 9:12, 13; Kol. 3:12-14)
- Pendeni Luku 7:11-17.
Mba nindo abo abalufisye abakwababo mu mfwa bangasangalalila kufi baYesu baasukile mukamfwilwe wa ku Naini? (Luku 7:13; 2 Kol. 1:3, 4; Ebeya. 4:15)
- Pendeni Yoane 11:17-44.
Cindo baYesu bacitile icilukutubula ati umuntu uuli onse lukoso koti alila kani umukwabo afwa? (Yoa. 11:33-36, 38; 2 Sam. 18:33; 19:1-4)
