THAWNTHU 92
Isuan Mitthi A Kaitho
HETA naupang i hmuh hi kum 12 mi a ni. A kut Isuan a chelh a, a kiangah a nu leh a pa an ding a. Engvanginnge hlim em ema an lan i hria em? I hmuchhuak ang u.
Naupang pa chu mi pawimawh tak, a hming Jaira a ni a. Ni khat chu a fanu a dam lo va, khumah a muttir a. Mahse a tha chuang ta lo va. A na zual deuh deuh va. Jaira leh a nupui chu, an naupang te chu thi dawna a lan avangin an lungngai em em a. An fanu neih chhun a ni a. Tichuan Jaira chu Isua zawng turin a kal ta a. Isua thilmak tih chanchinte a hre tawh a.
Jairan Isua a hmuh chuan, a velah mipui tam tak an awm a. Mahse Jairan mipui a su tlang a, Isua ke bulah a bawk a. ‘Ka fanu nasa takin a dam lo va. Lo kal la, khawngaih takin amah rawn tidam ta che,’ tiin a ngen a. Isuan a lo kal ang tih a hrilh a.
An kal laiin, hnaih lehzual tumin mipuiin an nek huai huai a. Thawkkhatah Isua a chawl a. ‘Tunge mi khawih?’ tiin a zawt a. Isuan amah atanga thiltihtheihna chhuak a hria a, chuvangin tuinemaw amah a tawk tih a hria a. Mahse tunge ni? Hmeichhia, kum 12 mi, nasa taka dam lo a ni. A lo kal a, Isua puan a tawk a, a dam ta a ni!
Isua tan mi tihdam a awlsamzia a hmuh theih vangin, chu chuan Jaira awm a tinuam deuh hlek a. Mahse zualko a lo tlan a. ‘Isua tibuai tawh suh. I fanu a thi tawh,’ tiin Jaira a hrilh a. Isuan chu chu a hria a, Jaira hnenah: ‘Lungngai suh, a dam ang,’ a ti a.
A tawpa Jaira in an thlen chuan, lungchhe em emin mite an tap a. Mahse Isuan: ‘Tap suh u. Naupang chu a thi lo ve. A muhil mai a ni,’ a ti a. Mahse a thi a ni tih an hriat vangin an nui a, Isua an nuihsan a.
Isuan naupang pa leh nu leh a tirhkoh pathumte chu naupang mutna pindanah a luhpui a. A kutah a chelh a, ‘Tho rawh,’ a ti a. Heta i hmuh ang mai hian, a la nung a. A tho va, a kal vel a! Chuvang chuan a nu leh a pa an hlim em em a ni.
Hei hi Isuan mitthi a kaihthawh hmasa ber a ni lo. A hmasa ber Bible-in a sawi chu Nain khawpuia cheng hmeithai fapa chanchin a ni. A hnuah Isuan Lazara, Mari leh Marthi te nuta pawh mitthi atangin a kaitho va. Pathian ruat Lalber nia Isuan a awp hunah chuan, mitthite tam tak a tinung leh dawn a. Chumi chungchangah chuan kan lawm thei lawm ni?
