AJU txin lu iqʼin 12 abʼqʼi tuʼn. Tzyuʼn tqʼabʼ tuʼn Jesús, aqetzuntlju kabʼe xjal aʼyetzen ttatju tukʼe tnan. ¿Nel tnikʼa tiquʼn nche tzalajxix? Qo xnaqʼtzal tiʼj.

Nim toklen tman txin aju Jairo tbʼi. Pon jun qʼij jatumel tzaj tyabʼ txin, ex kubʼ koẍbʼaʼn twi jun watbʼil. Mas tzajxix tyabʼ, mitiʼx bʼanix tal txin lu. Tzaj bʼaj kykʼuʼj Jairo tukʼe t-xuʼjil, tuʼnjo chʼixtoq tkyim txin. Quʼn oʼkxteq jun tmeʼljo (tmyaljo). Xiʼ Jairo jyolte Jesús. Quʼn otaq tbʼi aju nim tbʼanel nbʼanttaq tuʼn Jesús naq tuʼn tipumal Jehová.

Tej tkanet Jesús tuʼn Jairo, attoq nimxix xjal tukʼel Jesús. Okxtzun Jairo kyxol xjal ex kubʼ mutzeʼ t-xe tqan Jesús ex xi tqʼamaʼn te: ‹Najsame, yabʼxix taʼ nmeʼjele, ku ttzaja, qʼaninkuya›. Bʼaʼn chi Jesús xi tqʼamaʼn.

Tej nchi bʼetteq, nokx kylimontaq (kylamontoq) kyibʼ xjal tuʼn kypon laqʼeʼ ttxlaj Jesús. Naq minabʼen kubʼ weʼ Jesús ex xi tqanin: ‹¿Alkye sok tzyun weye?› Tnaʼ Jesús qa otaq tzʼel ipumalj tiʼj ex el tnikʼ qa at jun otaq tzʼok makonte. ¿Alkyetzele otaq tzʼok makonte? Ateq jun xuʼj aju otaq bʼant 12 abʼqʼi ttzajlen tyabʼ. ¡Ul ex ok ttzyuʼn t-xbʼalun Jesús, ex qʼanit!

Ok tqʼuqbʼaʼn jlu tkʼuʼj Jairo, tuʼnju nya kwest tuʼn kyqʼanit xjal tuʼn Jesús. Ultzun jun xjal qʼol tqanil ex xi tmaʼn te Jairo kyjalu: ‹Miʼ tzaj ttxkoʼntla Jesús quʼn ma kyim tmeʼla›. Tbʼi Jesús jlu ex xi tqʼamaʼn te Jairo: ‹Miʼ tzaj bʼaj tkʼuʼja, aju tmeʼjela ok kbʼantel›.

Tejtzen kypon tja Jairo, in che oqʼteq xjal wen tuʼn kybʼis. Atzunte Jesús xi tqʼamaʼn kye: ‹Miʼn che oqʼe; nya kyimni te txin noq in tan›. Atzun kye xjal naq e jaw tzeʼn tiʼj Jesús, quʼn ojtzqintoq kyuʼn qa otaq kyim tal txin.

Okxtzun Jesús tukʼe ttat ex tnan tal txin kyukʼex oxe t-apóstol tuj kwart jatumel taʼtoq txin. Kubʼ ttzyuʼn Jesús tqʼobʼ tal txin ex tqʼama: ‹Weʼktza txin› ex jaw anqʼin juntl maj tal txin, ik tzeʼnj tkuʼx toj tilbʼilal. ¡Jaw weʼ ex ok ten bʼetil! Tuʼntzun jlu e jaw tzalajxix tman ex ttxuʼ.

Nya ateq tnejel xjal jlu otaq jaw itzʼj tuʼn Jesús. Aju tnejel xjal otaq jaw anqʼin, aju tal jun viud xuʼj in najantoq toj tnam Naín. Ax ikx otaq jaw itzʼj Lázaro tuʼn aju kyxibʼin María tukʼe Marta. Aj tkawin Jesús, aju o tzaj qʼoʼn toklen tuʼn Dios, ok chi jawil itzʼj nimxix xjal tuʼn. ¿Mlaypetzulo qo jaw tzalaj tuʼn jlu?