TYÄˈÄDË kixyuˈunk mäjmajtskë jyëmëjt diˈib yam mˈijxypy. Yëˈë Jesús jam këˈëmëmäjtsëp, ets diˈib jam tënääytyëp yëˈë tyääk mëdë tyeety. ¿Mnijäˈäp tiko jam jotkujk jyantsy kyëxëˈëktë? Min nˈokˈijxëm.

Tyäˈädë kixyuˈungë tyeety ja txëˈäjty Jayrʉ, yëˈë tuˈugë jäˈäy diˈib mëj ijt. Tëgok ta ja nyëëx pyäˈämbejty, ets ta ojts myabajnbajnë. Kyaj nyekyˈagëdaky niˈigyë ojts myëjtaknë. Ta ja Jayrʉ mëdë nyëdoˈoxy jyantsy jotmaytyuktëjkëdë yëˈko ogäämbë nety ja nyëëx. Ets tukpäjkë nety tnëëxˈaty. Päätyë Jayrʉ tnitsoˈonyë Jesús, yëˈko të nety tmëdoyˈaty ko Jesús tyuumbyë mëjˈäjtënë.

Ko ja Jayrʉ tpatyë Jesús tamë nety mëdë may jyaˈay. Ta ttuknäjxy ja may jyaˈay ets ta nyaygyoxtënääytyakë Jesús wyinduujy ets ta tmënuˈkxtaky: Mëjtaˈagyëts jamë nnëëx pyekyëty, joˈomdë tunë mayˈäjtënë ets xyaˈagëdäˈägët. Jesús ta tkupejky.

Ta ojts tsyoondë ets ja may jyaˈay ta jyantsy nyaytyij jyantsy nyayokëdë. Ta tiˈinë Jesús ojts wyäˈkwëˈëmë ets dyajtëëjy: ¿Pënëts të xytyony? Jesús jyäˈäjë ko ja myëjää pyëtseemy ets ko të nety pën tyonyëty. Per ¿pën diˈib toonë? Yëˈë tuˈugë toxytyëjk diˈibë nety kujk pyäˈämˈijnë mäjmajtsk jëmëjt. Yëˈë tyoonë Jesusë wyit ets ta yˈagëdaky.

Tyäˈädë yëˈë diˈibë Jayrʉ jotkujkmooyë ko tˈijxyë Jesús pojënë jäˈäy dyaˈagëdaˈaky. Per ta net myiiny tuˈugë kugajpxy ets tˈanmääyë Jayrʉ: Të ja mnëëx yˈoˈknë, katë xynyekynyeˈemyë Jesús. Ko dëˈën tmëdooyë Jesús ta tˈanmääyë Jayrʉ: Katë mjotmayˈooky.

Ko jyäjttë mä Jayrʉ tyëjk tamë netyë jäˈäy jyantsy myay jyantsy tyäjtë ets jyantsy jyëˈëjy jyantsy yäˈäxtë. Perë Jesús ta jyënany: Katë mjëˈëjy myäˈäxtë tadë kixyuˈunk kyaj të yˈooky, määp jap. Per ja jäˈäy ta ttukxiktë Jesús jaˈko nyijäˈädëbë nety ko të yˈoˈknë.

Ta netë Jesús tyëjkë mä nety jap ja kixyuˈunk, mët ja kixyuˈungë tyääk tyeety ets mët nidëgëëgë yˈapostëlë. Ta net tkëˈëmëmäjtsë ja kixyuˈunk ets tˈanmääjy: ¡Pëdëˈëk! Net ja kixyuˈunk jyukypyejky extëm yam xyˈixy. ¡Ta pyëdeˈky! Pääty yamë tyäˈädë kixyuˈungë tyääk tyeety jantsy jotkujk nyayjawëdë.

Tyäˈädë kixyuˈunk kyaj yëˈëjëty diˈibë tim jawyiin Jesús yajpëdëˈk. Pën tim jawyiin yajpëdëˈk yëˈë tuˈugë kuˈooky jyaˈayë myäänk diˈibë nety tsënaapy Naín. Ok ta dyajpëdeˈkyë Lázarʉ ja myëgaˈaxë Mariiʉ etsë Martʉ. Ko Jesús tyëkët anaˈambë extëmë rey, ta dyajpëdëˈëgäˈäny mayˈitë jäˈäy diˈib të yˈoˈknë. ¿Këdii jotkujk nayjäˈäjëm ko dëˈën nijäˈäjëm?