HISTORIA 92
Ta̱ Jesús sándátakura na̱ ni̱xi̱ʼi̱
ÑÁ LOʼO ñá va̱xi nu̱ú na̱ʼná yóʼo 12 ku̱i̱ya̱ ndíka̱a̱ñá. Ta̱ Jesús tíin ndaʼa̱ñá ta na̱ ndíta yatin nu̱úñá kúú yiváñá xíʼin siʼíñá. ¿Á xíni̱ún ndachun kúsi̱íní-inina? Yóʼo sakuaʼayó ndachun kúsi̱íní-inina.
Jairo naní yivá ñá loʼo yóʼo, ta iin chiñu káʼnu kúúmiíra. Iin ki̱vi̱ ki̱ʼin kue̱ʼe̱ ñá loʼo se̱ʼera ta chi̱kandúʼunañá nu̱ú xi̱to. Ta yáʼa ki̱vi̱ ku̱a̱ʼa̱nña ndéeka ndóʼoñá. Ta̱ Jairo xíʼin ñá síʼíra ki̱xaʼá ndíʼi̱ní-inina chi kuvivañá túvina. Iinlá saá kúú se̱ʼena. Ña̱kán ki̱xaʼá ta̱ Jairo nándukúra ta̱ Jesús. Chi xa̱xi̱niso̱ʼora ku̱a̱ʼání milagro kéʼé ta̱yóʼo.
Ku̱a̱ʼání na̱ yiví ku̱a̱ʼa̱n xíʼin ta̱ Jesús tá nda̱niʼí ta̱ Jairo ta̱yóʼo. Soo ta̱ Jairo ni̱ki̱ʼvira tañu na̱ yiví ta xi̱kuxítíra nu̱ú ta̱ Jesús, ta káchira xíʼinra: ʼNdeéní ndóʼo se̱ʼi̱, ndúkúi̱ ña̱ ma̱ní nu̱ún ná ku̱ʼún sandáʼúnñáʼ. Ku̱ʼu̱nva ta̱ Jesús káchira xíʼinra.
Tá xíkana ku̱a̱ʼa̱nna iin chíndaʼá táʼan na̱ yiví ña̱ va̱ʼa kuyatinna nu̱ú ta̱ Jesús. Kama xi̱kundichi ta̱ Jesús. Ta ni̱ka̱ʼa̱nra: ʼ¿Yukú na̱ ti̱in yi̱ʼi̱?ʼ Na̱kunda̱a̱-inira ña̱ ti̱in iinnara chi ke̱e ndée ña̱ kúúmiíra. Soo, ¿yukú na̱ ti̱inñaʼá? Iin ñaʼá ñá xa̱ku̱a̱ʼa̱n 12 ku̱i̱ya̱ kúúmií kue̱ʼe̱ ti̱inñaʼá. Ti̱inñá ti̱ko̱to̱ra ta nda̱ʼavañá.
Tá xi̱ni ta̱ Jairo ña̱yóʼo ni̱kusi̱íva-inira, chi xíni̱ra va̱ása yo̱ʼviña nu̱ú ta̱ Jesús ña̱ sandáʼara iin na̱ kúúmií kue̱ʼe̱. Soo ki̱xa̱a̱ iin ta̱ va̱xi xíʼin chiñu nu̱ú ta̱ Jairo ta káchira xíʼinra: ʼKǒo ka̱ʼa̱nkaún xíʼin ta̱ Jesús, chi xa̱ni̱xi̱ʼi̱va se̱ʼúnʼ. Ta̱ Jesús xi̱niso̱ʼora ña̱ ni̱ka̱ʼa̱n ta̱yóʼo, ta ni̱ka̱ʼa̱nra xíʼin ta̱ Jairo: ʼKǒo kundi̱ʼi̱-iniún ndaʼava se̱ʼúnʼ.
Tá ni̱xa̱a̱na chí veʼe ta̱ Jairo xákukaví na̱ yiví. Soo ta̱ Jesús ni̱ka̱ʼa̱nra xíʼinna: ʼVa̱ása kuakundó. Tákuva ñá loʼo. Ñá kísi̱va kúúñáʼ, káchira xíʼinna. Soo na̱yóʼo xáku̱na ta kúsi̱kindaanara, chi xíni̱na ñá xa̱ni̱xi̱ʼi̱va kúúñá.
Tasaá ni̱ki̱ʼvi ta̱ Jesús ini cuarto nu̱ú chi̱kandúʼuna ñá loʼo yóʼo, ni̱ki̱ʼvi yiváñá, siʼíñá xíʼin inkaka u̱ni̱ na̱ apóstol ta̱ Jesús. Tasaá ti̱in ta̱ Jesús ndaʼa̱ñá ta káchira xíʼinñá: ʼNdako̱o ñá loʼoʼ. Koto nu̱ú na̱ʼná yóʼo, ñáyóʼo nda̱takuvañá. Nda̱ko̱oñá ta ki̱xaʼáñá xíkañá. Xa̱ʼa ña̱yóʼo kúsi̱íní-ini yiváñá xíʼin siʼíñá.
Su̱ví ñá loʼo yóʼo kúú ñá nu̱ú nísandataku ta̱ Jesús. Chi xa̱siʼnakava sa̱ndátakura ta̱ loʼo se̱ʼe iin ñá nána ñá xa̱ni̱xi̱ʼi̱ yií ñá íyo ñuu Naín. Xa̱sa̱ndátakutura ta̱ Lázaro ta̱ ku̱ʼva ñá María xíʼin ñá Marta. Tá ná kaʼndachíñu ta̱ Jesús ku̱a̱ʼání na̱ yiví sandátakura.
