TLAPOUALISTLI 92

Jesús okinyoliti akinmej omikej

ICHPOKATSIN tlen nikan tikita kipia 12 xiuitl. Jesús kimakitskijtok, uan inantsin uan itajtsin noijki ompa yetokej. ¿Tikmati tleka melauak yolpaktokej? Ma tikitakan.

Itajtsin nin ichpokatsin omotokayotiaya Jairo uan ye okatka se tlakatl ueyititok. Se tonal nin ichpokatsin omokoko miak, uan okitekakej ipan itlapech. Maski ijkon, amo opajtik, okachi omokoko. Jairo uan isiua omotekipachojkej miak, pampa omoitaya ichpokatsin mikiskia. San se ikone okipiayaj. Ik non, Jairo okitemoto Jesús. Jairo okikak itech nochtin milagros tlen Jesús okichiuaya.

Ijkuak Jairo okajsik Jesús, sapanoa miakej tlaltikpaktlakamej okiyaualoayaj. Maski ijkon, Jairo opanok intlajkotia nochtin tlaltikpaktlakamej uan ijkuak oajsik, omotlankuaketski ixpan Jesús. Okijto: ‘Noichpokatsin mokokoa miak’. Uan okitlatlaujti: ‘Xiuiki, uan xikpajti’. Jesús okilui yaskia.

Ijkuak yejuan onejnentiayaj, miakej tlaltikpaktlakamej omotojtopeuayaj pampa okinekiayaj yetoskej inauak Jesús. San niman, Jesús omoketski uan okijto: ‘¿Akin okikitski notlaken?’. Jesús okimachili okiski ichikaualis, uan okimatiaya akaj okikitski. ¿Akin okikitski? Se siuatl tlen yokipiaya 12 xiuitl omokokoaya. Oyajki uan okikitski itlaken Jesús, uan opajtik.

Nin okiyolchika Jairo, pampa okitak ken Jesús amo oui okipajtiaya akaj. Maski ijkon, san niman ouala se itlakeual uan okilui Jairo: ‘Ayakmo itlaj xikilui Jesús. Moichpokatsin yomikik’. Jesús okikak nin uan okilui Jairo: ‘Amo ximotekipacho, moichpokatsin kuali yetos’.

Ijkuak oajsitoj ikalijtik Jairo, tlaltikpaktlakamej ochokayaj miak. Maski ijkon, Jesús okinmilui: ‘Amo xichokakan. Ichpokatsin amo omikik. Ye san kochtok’. Maski ijkon, akinmej ompa okatkaj san ouetskakej uan okipinatijkej Jesús, pampa yejuan okimatiayaj ichpokatsin yomikik.

Ijkuakon, Jesús, itatajuan ichpokatsin uan eyi itlatitlaniluan okalakej kalijtik kanin okatka ichpokatsin. Okimakitski uan okilui: ‘Ximeua’. Uan ichpokatsin omoyoliti, ken tikita itech tlaixkopinal. Omejki uan opejki nejnemi. Ik non, inantsin uan itajtsin oyolpakej miak.

Nin ichpokatsin amo ye akin achto okiyoliti Jesús. Achto okiyoliti itelpoch se iknosiuatl tlen ochantiaya itech Naín. Satepan, Jesús noijki okiyoliti Lázaro, ikni María uan Marta. Ijkuak Jesús peuas tlanauatis, ken ueyi tekiua akin toTajtsin Dios yokitlali, kinyolitis sapanoa miakej tlaltikpaktlakamej. Nin melauak techyolpaktia miak.

Lucas 8:40-56; 7:11-17; Juan 11:17-44.