Historia 92

Jesús kinyolitia akin yomijkaj

ICHPOCHTSINTLI akin nikan tikita kipiya 12 xiuitl. Jesús kajsitika ipan ima, niman inan iuan itaj nemij ompa nisiu. ¿Tikmatstika tleka melak pakij? Matikitakan.

Itaj ichpochtsintli se tlakatl akin ueyixtika, itoka Jairo. Se tonajli ikoneuj kualo, niman kitekaj ipan tlapechtli. San ika, xueli pajti; peua melak tlanaui. Jairo niman isiuauj melak najmanaj, pampa nesi mikis inkoneuj. San yejua inkoneuj kipiyaj. Ika yejon, Jairo kitejtemoua Jesús. Yejua yokitekakili milagros tlen Jesús yokichiuj.

Ijkuak Jairo konnextia Jesús, melak tojlan iyeualiyan nemilo. San ika, Jairo tetsajlan panoua niman notlakuanketsa ixpan Jesús. ‘Nokoneuj imiktika’, kijtoua. ‘Nimitstlajtlanilia, nouan xuajla niman xpajtiti’, kitlatlaujtia. Jesús kijtoua ika yas.

Ijkuak yauej, ipan ojtli melak nomapeualo, kinekij kinisiuiskej. Jesús noteltia. ‘¿Akinon onechkitski?’, tetlajtoltia. Jesús okimat ika itech okis ikojtilis, niman okimat ika yakaj okonkitski. San ika, ¿akinon? Se siuatl akin kipiaya 12 xiuitl ika kualouaya. ¡Ouajla itech Jesús niman okonkitski itlaken, kuakon opajtik!

Yejuin kichiua Jairo mayolseui, pampa kita ika Jesús ueli kipajtia maski san akinon. San ika, kuakon uajlauj se itlakeual niman kijlia: ‘Maka sa xpasolo Jesús. Moichpokatsin yomik’. Jesús kikaki yejuin niman kijlia Jairo: ‘Maka xmajmana; pajtis mokoneuj’.

Ijkuak ajsij ichan Jairo, akin ompa nemij melak chikauak kichokiliaj. San ika, Jesús kimijlia: ‘Maka xchokakan. Ichpochtsintli xomik. San kochi’. Yejuamej san kiuejuetskiliaj Jesús, pampa kimatstokej ika ichpochtsintli yomik.

Kuakon Jesús yauj kalijtik imiuan yeyimej itlatitlankauan niman Jairo iuan isiuauj, kampa nemi ichpochtsintli. Jesús kajsi ipan ima niman kijlia: ‘¡Xmokuiteua!’ Niman ichpochtsintli yoliui, ken nikan tikita. ¡Nokuiteua niman nejnemi! Ika yejon, itaj niman inan melak pakij.

Yejuin ichpochtsintli xkachtopa akin Jesús kiyolitia. Kachtopa okiyoliti ikoneuj se siuakauajli akin chanti ipan ueyikalpan Naín. Sakin, Jesús noijki kiyolitia Lázaro, ikniuj María iuan Marta. Ijkuak Jesús tlayekanas kentla tekiuaj, akin toTajtsin okitlali, kinyolitis miyekej tlaltikpakchanejkej. ¿Xmelak techpaktia yejon?

Lucas 8:40-56; 7:11-17; Juan 11:17-44.