RI ALI kawil waral pa ri wachbʼäl kʼo 12 ujunabʼ. Jesús uchapom che uqʼabʼ, ri utat xuqujeʼ ri unan e kʼo rukʼ. ¿La awetaʼm suche kkikotik? Chqilampeʼ.

Ri utat ri ali are jun achi nim ubʼantajik ubʼiʼ Jairo. Pa jun qʼij ri umiʼal xuriq yabʼil, xkeya puwiʼ jun chʼat. Tekʼuriʼ xa xnimtajik. Ri Jairo xuqujeʼ ri rixoqil sibʼalaj kebʼisonik, rumal che kkilo che ri ali tijan kkamik. Jairo xa jun umiʼal kʼolik. Rumal laʼ ri Jairo xbʼe che utzukuxik ri Jesús. Areʼ xuta ri täq milagros kubʼan ri Jesús.

Chiʼ Jairo xuriq ri Jesús, e kʼo kʼi täq winaq rukʼ ri Jesús. Tekʼuriʼ Jairo xqʼax che kixoʼl ri winaq tekʼuriʼ xukeʼ chuwäch ri Jesús, xubʼij che. ‹Ri numiʼal sibʼalaj yawabʼ› ‹chabʼanaʼ jun toqʼobʼ, chakunaj›, xchaʼ. Jesús xubʼij che kopan che ubʼanik wariʼ.

Chiʼ tijan kebʼinik, ri täq winaq kkechʼikmij ri Jesús rech e kʼo che unaqaj. Tekʼuriʼ ri Jesús xtakʼeʼik. ‹¿Jachin xinuchapo?› Xchaʼ. Jesús xunaʼo che xukoj ri uchoqʼabʼ, xuqujeʼ retaʼm che kʼo jun winaq xchapowik. ¿Jachin laʼ? Are jun ixoq 12 junabʼ chik yawabʼ. ¡Xpetik tekʼuriʼ xuchap ri ratzʼyaq ri Jesús, rumal laʼ xkuntajik!

Wariʼ xubʼano che Jairo xkikotik, rumal che xrilo che ri Jesús kʼäx ta kuriq che ukunaxik jun winaq. Tekʼuriʼ xpe jun ajqʼaxal tzij. ‹Kʼo ta chi kabʼij che ri Jesús›, xchaʼ che Jairo. ‹Ri amiʼal xkamik.› Jesús xuta wariʼ tekʼuriʼ xubʼij che Jairo: ‹Xaq matbʼisonik; ri amiʼal utz ubʼanom›.

Chiʼ xeʼopan pa rachoch ri Jairo, ri winaq tijan keʼoqʼik. Tekʼuriʼ ri Jesús xubʼij: ‹Xaq mixoqʼik. Ri ali xkam täj. Xaq xiw tijan kwarik›. Tekʼuriʼ ri winaq xetzeʼn chirij Jesús, rumal che ketaʼm che ri ali kamnäq chik.

Tekʼuriʼ ri Jesús xuqujeʼ ri utat unan ri ali xuqujeʼ oxibʼ chike ri apóstoles xeʼok bʼi pa ri rachoch ri ali. Xuchap che uqʼabʼ tekʼuriʼ xubʼij: ‹¡Chatwaljoq!› Tekʼuriʼ xtzalij lo ri ukʼaslemal, chawilampeʼ pa ri wachbʼäl. ¡Xwaljik tekʼuriʼ xbʼinik! Rumal wariʼ ri utat unan ri ali sibʼalaj xekikotik.

Wariʼ are ta ri nabʼe winaq che xuwalsaj ri Jesús che kixoʼl ri kamnäq. Ri nabʼe are ri ral jun malkaʼn ixoq kʼo pa ri tinamit ubʼiʼ Naín. Jesús xuqujeʼ xuwalsaj ri Lázaro, kixibʼal María xuqujeʼ ri Marta. Chiʼ Jesús kbʼan ajawinel che, kubʼan qʼatbʼaltzij, tekʼuriʼ keʼuwalsaj na sibʼalaj kʼi täq kamnäq. ¿La kojkikotik rumal wariʼ?