CHUNKA ishkë watayoqshi këchö rikëkanqëki warmi wambraqa. Makipitam Jesusqa tsararëkan, nöpanchönam papäninwan mamänin këkäyan. ¿Imanir-raq tsëläya kushishqa këkäyan, musyankiku? Mä rikärishun.

Jairo nishqan reqishqa nunash tsë wambrapa papäninqa. Huk kutish qeshyakurkunaq wambran, tsënash punuratsiyänaq. Pero manash alliyantsu, masshi antsäkurkunaq. Alläpash Jairoqa warminwan yarparëkuyänaq hapallanlla wambrankuna wanureqnöna kaptin. Jesús milagrokuna ruranqanta wiyarshi Jairoqa ashinaq pëta.

Y atska nunakuna rurinchö këkaqtash taririnaq Jairoqa Jesusta. Tsënash Jairoqa, Jesuspa chakinman ishkirinaq nunakuna chöpimpa yëkurir. ‘Tsurillämi alläpa lastima këkan, aksëqa kallëtsu shamur kachakëkatsillämï,’ nishpash rogakunaq. Tsënash, ‘sharëkämümi,’ ninaq Jesús.

Ëwarëkäyaptinnash, más witita munar nunakunaqa más kumanakïkuyänaq. Tsënash Jesusqa shäkïkunaq alli ëwarëkar. ‘¿Pitaq yataramashqa?,’ nishpa nirnin. Podernin yarqurishqantash mäkurinaq, tsëshi yatayanqanta musyanaq. Pero ¿piraq? Chunka ishkë watana qeshyakoq warmish kanaq. ¡Y kachakärinaq shamur Jesuspa ratashninta yatarirshi!

Tsëshi Jesús pitapis alërulla kachakäratsenqanta rikar Jairoqa alläpa kushïkunaq. Pero tsënö këkaptinnash: ‘Jesustaqa amana piñatsinatsu, wanurishqanam tsurikiqa,’ nishpa ninaq huk willakoq Jairota. Tsëta wiyarirnash Jesusqa: ‘Yamëyärenqam tsurikiqa, ama yarparëtsu,’ nishpa ninaq Jairota.

Y Jairopa wayinman chäriyaptinnash, selläma llakishqa nunakuna waqakïkäyänaq. Pero ‘ama waqayëtsu. Punïkanllam tsë wambraqa, manam wanushqatsu,’ nishpash ninaq Jesús. Rasumpa wanushqa kanqanta musyarshi, asikuyänaq nunakuna Jesuspita.

Tsënash kimaq apostolninkunawan y tsë wambrapa mamäninwan y papäninwan yëkuriyänaq wambra sutarëkanqan cuartoman. ‘¡Sharkï!,’ nishpash ninaq makipeq tsarirkur, y këchö rikëkanqëkinöshi yapë kawariramunaq tsë wambra. ¡Purirshi qallëkunaq sharkur! Tsëshi kushishqa këkäyan papäninwan mamänin.

Wanushqakuna rurimpitaqa manash pëllataraqtsu Jesús kawariratsimushqa kanaq. Puntataqa Naín markachö täraq huk viudapa wawantash shäriratsimushqa kanaq. Tsëpitanash Jesusqa, María y Marta nishqan warmikunapa turin Lázaro shutiyoqta kawaritsimushqa kanaq. Teyta Diospa reyninnö gobernamurshi atska nunakunata kawaritsimonqa Jesusqa. ¿Tsëqa manaku noqantsikta kushiratsimashwan?