NTSIKANA anaonemwe pano ali na piaka 12 pyakubalwa. Yezu aphata dzanja yace, na mama na baba wace alimira cifupi na iye. Kodi musadziwa thangwi yanji iwo asaoneka kukhala akukomerwa kakamwe? Tendeni tione.

Baba wa ntsikana akhali mamuna wakufunika wakucemerwa Yairo. Ntsiku inango mwanace wankazi aduwala, mbagoneswa pa talimba. Mbwenye iye hadawanga tayu. Utenda ukhanyanya kakamwe. Yairo na nkazace anenseka kakamwe, thangwi kukhaoneka ninga kantsikana kawo mbakadadzafa. Iye akhali mwanawo mbodzi ene basi. Natenepa Yairo aenda kasaka Yezu. Iye akhadabva pya pirengo pikhacita Yezu.

Yairo mudagumana iye Yezu, pakhali mwinji ukulu wakunzungulira. Mbwenye Yairo apita m’mwinji mbagwa pa miendo ya Yezu. Iye alonga: ‘Mwananga akuduwaladi kakamwe.’ Yairo adembetera: ‘Ndaphata mwendo, bwerani mudzamuwangise.’ Yezu alonga kuti mbadaenda kweneku.

Mukhafamba iwo pabodzi, mwinji ukhapitiriza na kugwinyana towera ufike duzi kakamwe. Mwakudzidzimusa Yezu alimira. Iye abvunza: ‘Mbani andigwentsa?’ Yezu abva mphambvu kubuluka mwa iye, natenepa adziwa kuti alipo munthu adangwentsa. Mbwenye mbani? Akhali nkazi wakuti akhaduwala kakamwe m’piaka 12. Iye afendedzera mbagwentsa pyakubvala pya Yezu, mbawangiswa!

Pyenepi pyacitisa Yairo kupibva mwadidi, thangwi iye akwanisa kuona kuti nkhabe nensa kwa Yezu kuwangisa munthu. Mbwenye buluka penepo nyamphangwa abwera. Iye apanga Yairo: ‘Lekani nensabve Yezu. Mwananu alowa.’ Yezu abva ipi mbalonga kwa Yairo: ‘Leka nenseka, iye anadzakhala mwadidi.’

Pakumalisira mudafika iwo kunyumba kwa Yairo, anthu akhalira m’kutsukwala kukulu. Mbwenye Yezu alonga: ‘Lekani kulira. Mwana hadafa tayu. Iye ali kugona basi.’ Mbwenye iwo aseka na asingirira Yezu, thangwi iwo akhadziwa kuti iye akhadafa.

Yezu akwata baba na mama wa ntsikana na apostolo ace atatu mbapita m’kwartu ikhadagoneswa mwana. Iye amphata na dzanja mbalonga: ‘Lamuka!’ Na iye akhala pontho maso, ninga munaonemwe pano. Iye alamuka mbafamba! Ndi thangwi ineyi mama na baba wace akomerwadi kakamwe.

Uyu si munthu wakutoma adalamusa Yezu kwa akufa tayu. Wakutoma analonga Bibilya ndi mwana wamamuna wa nzice akakhala m’nzinda wa Nayimu. M’kupita kwa nzidzi, Yezu alamusambo Lazaru, mwanamamuna wa Mariya na Marta, kwa akufa. Munafuna kudzatonga Yezu ninga mambo wa Mulungu, anadzabweresa anthu azinji kakamwe akufa ku umaso. Kodi ife nkhabe kukomerwa na pyenepi tayu?