KOYE laˈˈatto beetto 12 dirite. Yesuusi angase amade no; amasenna annise kayinni mule uurre no. Insa togo ikke hagiidhinohu mayiraatiro afootto? Hanni laˈno.

Beettote anni Iyyairoosi yinanni murrichchaati. Mitto barra qaaqqosi xiwante goxxu. Goxxolla ikkinnina diwoyyinose; xiwanu lexxanni haˈrise. Iyyairoosinna galtesi beettonsara xiwanu lexxanni haˈrino daafira lowo geeshsha dadillitu. Insara noonsa beetto iseetilla. Konni daafira Iyyairoosi Yesuusa hasanni haˈri. Iyyairoosi Yesuusi assanni noo maalalere macciishshino.

Iyyairoosi Yesuusinni xaadi wote, Yesuusi ledo lowo manni no. Iyyairoosi lowo manni giddoonni hige mare Yesuusira lekkate uwi. Yesuusa togo yee huucciˈri: ‘Qaaqqoˈya lowo geeshsha xiwantino. Eeggatena amo hursise.’ Yesuusino maahoyye yii.

Hadhanna doogote, ledo noohu lowo manni Yesuusiwa shiqqi yaara mimmito cifanni no. Hedeweelcho Yesuusi agure uurre, ‘Kisiehu ayeeti?’ yee xaˈmi. Yesuusi wolqa isiwiinni fultanna afino daafira, kisinosihu noota afino. Kisinosihu ayeetiyya? Kissinositi 12 diro xiwante keeshshitinote mitte manchooti. Ise Yesuusiwa shiqqi yite uddanosi kisse hurte kaˈino!

Iyyairoosi tenne laiti sheshifati; korkaatuno Yesuusira xiwantinore hursa shiimare ikkitinota laino. Hakkiinnino sokkaanchu daye Iyyairoosira togo yee kulisi: ‘Yesuusa beebba daafursitooti. Qaaqqokki reyitinona.’ Yesuusi tenne macciishshe Iyyairoosi, ‘Massooti; qaaqqokki hurtannona’ yiisi.

Insa baalunku Iyyairoosi qae martanno wote, mannu lowo geeshsha xissiisire wiˈlanni no. Yesuusi kayinni togo yiinsa: ‘Wiˈlitinoonte; beetto goxxinolla, direyitinona.’ Mannootu kayinni beetto reyitinota affino daafira Yesuusa osoˈlitusi; qolteno qacifattusi.

Hakkiinnino Yesuusi beettote annanna ama qoleno sase hawaariyaatesi beetto noo minira haare ei. Isino beettote anga amade, ‘Gotti yii!’ yiise. Koye misilete aana laˈˈattonte gede beettono reyotenni kaˈu. Iseno gotti yite haˈrantu! Annisenna amase lowo geeshsha hagiidhinohu iseraati.

Yesuusi umo reyotenni kayisinoti ditenne beettooti. Umo reyotenni kayisinohu Nayina yinanni katamira heedhanno gunnitte mancho beetto ikkinota Qullaawu Maxaafi kulanno. Yannate gedensaanni Yesuusi Maariyaaminna Maarta rodoo Alaazaarino reyotenni kayisino. Yesuusi Maganu doorino nugusa ikke moohanno yannara, reyinoha lowo manna reyotenni kayisanno. Tini lowo geeshsha dihagiirsiissannonke?