INIUNKWASE í ú nenge a mi heen ne ngi anyom 12. Yesu ngu kôron un uwegh, man ngô na kua ter na ve tile ikua. Ú fa er i hii ve vé lu saan saan nahan kpa? De se hen se fa.

Ter u iniunkwase ne ka zegeor je iti na er Yairu. Iyange igenegh yô wan na u kwase gba angev kpishi, man í kôr un gambe. Kpa á zua a guda ga. Angev nav mbura mbu hemba yemen hemen hemen cii. Ishima za Yairu kua kwase na iyol kpishi je, sha ci u ka inja er wanakiriki ve u kwase ne una kpe nahan. Ka cii wan ve u kwase je ne. Nahan Yairu yem u keren Yesu. A vande ungwan uivande mba Yesu lu eren la.

Shighe u Yairu va zua a Yesu la, ikpelaior i̱ kase un kpishi. Kpa Yairu nyôr ken ikpelaior la man a gba hen angahar a Yesu. ‘Wan wam u kwase ngu uange kpishi, kpishi je,’ a kaa a na nahan. ‘Wea lumun yô, va va bee un mbú,’ a zamber nahan. Yesu kaa er una za.

E̱r ve lu yemen sha gbenda yô, ior lu tuur sha u vea kporom a na ikua yô. Fese nahan man Yesu tile. ‘Ka an nan bende a mo?’ kape a pine la. Yesu kav er tahav due ken a na kera, nahan a fa er or nan bende a na. Kpa ka ana? Ka kwase u á lu uange kpishi kuma anyom 12 yô. Yange kporom va bende a ikyondo i Yesu, man angev nav mbu bee!

Kwagh ne na Yairu mpever ken ishima, sha ci u a nenge er i lu Yesu kwagh u ican ga u been or angev nahan. Kpa hen shighe la man ortyom za va. ‘De kera ze Yesu iyol ga,’ a kaa a Yairu nahan. ‘Wan wou u kwase kpe.’ Yesu ungwa kwaghôron ne nahan a kaa a Yairu er: ‘Ishima i̱ de zeu iyol ga, kwagh á er un ga.’

Shighe u mba za nyer hen ya u Yairu yô, ior lu vaan a ijungwen kpishi je. Kpa Yesu kaa er: ‘De vaan nen ga. Wanakiriki la kpe ga. Ngu yaven a yav tsô.’ Kpa ve se shi ve naha Yesu tar, sha ci u ve fa dedoo er a kpe.

Tsô Yesu kua a ter man ngô u wanyekwase la kua mbaapostoli nav utar ve nyôr ken iyou i̱ i gbir wan shon la. A kôr un sha uwe man a kaa er: ‘Mough sha!’ Tsô a nder, vough er ú nenge heen nahan. Man a mough shi a zende sha kpaa! Ka ityôkyaa i i ne ve ngô na man ter na ve lu saan saan yum, yum je ne.

Ka or u hiihii u yange Yesu nder nan shin ku ne ga. U hiihii u Bibilo i̱ ôr kwagh sha mi yô ka wan u kwasecôghol u a lu ken gar u Nain la. Ken hemen yô, Yesu shi nder Lasaru, anmgbian u Maria man Marta, shin mbakpenev. Shighe u Yesu una va hingir tor u Aôndo una na la yô, una hide a ior kpishi, kpishi je vea hingir uma. Kwagh la na se msaanyol ga he?