92-нҗи хекая

Иса өлүлери дирелдйәр

БУ ГЫЗҖАГАЗ 12 яшында. Иса онуң элинден тутуп дур. Янында дуранлар болса гызҗагазың какасы билен эҗеси. Оларың нәмә бегенйәндигини билйәңми? Гел, билели.

Гызҗагазың какасының ады Яйрус. Оны хеммелер хорматлаярды. Бир гезек гызҗагаз кеселледи. Онуң ягдайы гүн-гүнден эрбетлешйәр. Яйрус билен аялы гызҗагаз өлер өйдүп гаты горкярлар. Себәби ялңыз гызыды. Шонуң үчин Яйрус Исаны гөзлемәге гидйәр. Ол Исаның гудратлары барада өңем эшидипди.

Яйрус Исаны адамларың арасындан тапяр. Ол адамларың арасындан гечип, Исаның аягына йыкыляр. Яйрус оңа: «Мениң гызым агыр кеселледи. Хайыш эдйәрин, гелип оны сагалтсана» дийип ялбаряр. Иса онуң билен гидйәр.

Ёлда адамлар Исаның янына барҗак болуп гысылышярдылар. Бирденкә Иса ызына өврүлип: «Ким маңа элини дегирди?» дийип сораяр. Себәби Иса өзүнден бир гүйҗүң чыканыны дуйяр. Оңа ким элини дегирдикә? Ол 12 йылдан бәри агыр кеселли аялды. Ол аял Исаның гейимине элини дегрен бадына сагаляр!

Исаның адамлары аңсатлык билен сагалдышыны гөрүп, Яйрус бираз рахатланяр. Бирденкә бир адам шейле хабар гетирйәр: «Гызың арадан чыкды. Мугаллымы алада гойма». Иса муны эшидип, Яйруса: «Алада этме, гызың говулашар» дийди.

Олар Яйрусың өйүне етенде аглашян адамлары гөрйәрлер. Йөне Иса адамлара: «Агламаң. Ол өленок. Диңе уклап ятыр» диййәр. Олар Исаның үстүнден гүлйәрлер, себәби гызың өлендигини билйәрдилер.

Шонда Иса гызың какасыны, эҗесини ве үч ресулыны алып, гызың ятан отагына гирйәр. Иса гызҗагазың элинден тутуп: «Гызым, турай!» диййәр. Гөршүң ялы гызҗагаз дирелйәр. Ол еринден туруп, отагың ичинде эйләк-бейләк йөрейәр! Муңа эҗеси билен какасы бегенйәр.

Иса диңе оны дирелтмәнди. Инҗилде айдылышы ялы, Иса илкинҗи гезек Наин шәхеринден бир дул аялың оглуны дирелтди. Шейле-де Иса Марта билен Меръемиң доганы Лазары хем дирелтди. Иса Худайың Патышалыгында хөкүмдарлык эденде, гаты көп адамлары дирелдер. Сенем муңа бегенйәнсиң, шейле дәлми?

Лука 8:40—56; 7:11—17; Яхя 11:17—44.