JA YAL akʼix waxa wila bʼa dibujo ayiʼoj 12 jabʼil. Jesús syamunej yi ja skʼabʼi, sok ja matik teye mojani jaʼa snan soka stat ja yal akʼixi. La kiltik jas yuj jel gustoʼayeʼi.

Ja stat ja yal akʼixi jun winik jel tʼilan sbʼiʼil Jairo. Jun kʼakʼu, ja yal akʼixi koʼ chamel sok ti yaʼawe bʼaʼan bʼa jun chʼat. Pe mini xtojbʼi. Jairo soka xcheʼumi jel chamskʼujole yujni wan ipaxel sok lajansok ojxa chamuk. Ja yeʼn jaʼita ja yakʼixe. Anto ja Jairo waj sleʼ ja Jesús yujni yabʼunej ja senyaʼik skʼuluneji.

Yajni Jairo staʼa kʼot ja Jesús, joybʼanubʼal yuj jitsan ixuk winik. Pe Jairo xchʼika och sbʼaj bʼa snalan ja ixuk winiki sok ti och mekʼan bʼa stiʼ sat ja Jesús sok yala: «Aʼawa pabor laʼ jmok, ja kakʼixi jelxa maloʼay, atojbʼuki». Jesús yalani oj wajuk.

Yajni wane bʼejyel och, ja ixuk winiki wa sjutbʼintalan sbʼaje bʼa oj mojxuke soka Jesús. Junta chʼaykʼujol, ja Jesús kʼot tekʼan sok sjobʼo: «¿Machunkʼa syamawoni?». Jesús yabʼ el yip bʼa yeʼna sok snaʼa ay maʼ yamji yuj. Pe ¿machʼa? Jun ixuk ayxa 12 jabʼil koʼel chamel. Waj ja bʼay ja Jesús, syama yi ja skʼuʼi soka yeʼn tojbʼi.

Ja it ya kulanskʼujol ja Jairo yujni wa xyila ja Jesús mi wokoluk xyabʼ yajel tojbʼuk ja matik yiʼoj chameli. Anto ti jul jun akʼa rason sok yala yabʼ ja Jairo: «Chamta ja wa wunin akʼixi, mokxa jasa walyabʼ ja Jesús». Jesús yabʼ ja it sok yala yabʼ ja Jairo: «Mi xcham akʼujol, ja yeʼn oj tojbʼuk».

Yajni kʼotye ja bʼa snaj ja Jairo, ja ixuk winiki wane okʼel. Ti yala ja Jesús: «Mi la okʼyex, ja yal akʼixi mi chameluk, kechan wan wayel». Ja ixuk winiki ti och stseʼlaye ja Jesús yujni wa snaʼawe ja yal akʼixi chamta.

Anto ja Jesús soka snantat ja yal akʼixi sok oxe ja bʼa snebʼumani ochye ja bʼa kwarto bʼay ja yal akʼixi. Jesús syama ja skʼabʼ ja yal akʼixi sok yala yabʼ: «¡Kʼeʼan!». Jastal ni waxa wila bʼa dibujo, ja yeʼn sakʼwijani. ¡Kʼeʼi sok kʼe bʼejyuk! Ja yuj ja stat soka snani jel gustoʼaxiye.

Ja it mi jaʼuk ja bʼajtan chamwinik wa xya sakʼwuk ja Jesús. Ja bʼajtani jaʼa yal skerem jun biguda ti kulan bʼa chonabʼ Naín. Tsaʼan ya sakʼwuk ja Lázaro, ja smoj-alijel ja María soka Marta. Yajni Jesús x-och jun mandaranum yuja Dyos sok xyaʼa ja smandari, oj ya sakʼwuk jitsan ixuk winik. ¿Mi maʼ xya gustoʼaxukotik snajel ja it?