TE TUT achʼix te ya awil liʼ ini ay lajchayeb yaʼbilal-a. Te Jesús stsakojbey skʼab te achʼixe, sok jaʼme smeʼ stat te machʼatik ay ta stsʼeele. ¿Yabal anaʼ bin yuʼun te kʼax tseʼel yoʼtanike? Yame kiltik bael.

Te stat te achʼixe jaʼ jtul winik te kʼax mukʼ skʼoplale, Jairo te sbiile. Jun buelta tsakot ta chamel te yantsil nichʼane, jich la yakʼik ta wayibal. Jaʼukmeto maba lekub, kʼunkʼun batsʼejxan. Te Jairo sok te yiname kʼax la smel yoʼtanik yuʼun, jich yilel te ya xlaj bael te tut achʼixe. Jaʼ jip jtul yantsil nichʼan-a. Jich yuʼun te Jairo bajtʼ sle te Jesús, melel yaʼiyojbey skʼoplal ta swenta te milagroetik spasoje.

Kʼalal te Jairo la sta te Jesuse, joytaybil yuʼun ants winiketik-a. Jaʼukmeto te Jairo kʼax ta yolil te ants winiketike sok la skejan sba ta yeʼtal yakan te Jesuse, jich la yalbey wokol: Kʼax ay ta tulan chamel te kantsil nichʼan. Laʼ, awokoluk sok lekubtesa. Te Jesús la yal te ya xbajtʼ yile.

Te kʼalal yakalik ta beel-ae, te ants winiketik yak stenbel sbaik yuʼun ya skʼan snoptsajik ta stojol te Jesuse. Ta oranax la stejkʼan sba te Jesús sok jich la sjojkʼoy: ¿Machʼa la spikon? Te Jesús la yaʼiy te lokʼ yuʼele, jich la snaʼ te ay machʼa pikot yuʼune. Jaʼukmeto, ¿machʼaniwan-a? Jaʼ jtul ants te ayix lajchayeb jaʼbil te ay ta chamel-ae. ¡Tal ta stojol te Jesús sok la spikbey te skʼuʼe, jich lekub te antse!

Ta swenta ini mukʼub kʼinal la yaʼiy yuʼun te Jairoe, melel la yil te ma wokoluk ya yaʼiy slekubtesel te machʼa ay ta chamele. Tey-abi tal jtul winik, jich la yalbey te Jairoe: Ma xawakʼbeyix swokol te Jesuse, lajix te awantsil nichʼane. Te kʼalal la yaʼiy stojol Jesús ini, jich la yalbey te Jairoe: Ma xamel awoʼtan, yame xlekub te awantsil nichʼane.

Te kʼalal kʼotik ta sna te Jairoe, yakalik ta okʼel sok ta mel oʼtan-a te ants winiketike. Jaʼukmeto te Jesús jich la yal: Ma x-okʼex. Maba lajem te tut achʼixe. Wayalnax. Jaʼukmeto jajch stseʼlayik sok jajch slabanik te Jesuse, melel la yilik te lajemix te tut achʼixe.

Jich te Jesús sok te smeʼ stat te achʼixe soknix oxtul jpuk kʼopetik ochik ta kuarto te banti ay te tut achʼixe. La stsakbey skʼab, sok jich la yalbey: ¡Jajchan! Jich chaʼkuxaj, jich bitʼil ya awil ta lokʼomba ini. ¡La stejkʼan sba sok jich jajch ta beel! Jich yuʼun kʼax tseʼel yoʼtanik te smeʼ stat te tut achʼixe.

Matonax jaʼuk sbabial buelta te ay machʼa schaʼkuxajtesoj te Jesuse. Te machʼa sbabial la schaʼkuxajtese jaʼ te yal jtul meʼba ants te ay ta nainel ta lum Naín. Jaʼnix jich ta patil la schaʼkuxajtes te Lázaro te jaʼ sbankil swix yijtsʼin sbaik sok te María soknix te Martae. Kʼalal ya xmantalaj jich bitʼil ajwalil te Jesús tsabil yuʼun te Diose, yame xchaʼkuxajtes bayal ta jtul ants winiketik. ¿Mabal jichuk ya skʼan te ya yakʼbotik stseʼelil koʼtantik ini?