LI TSEB te cha vile yichʼoj 12 jabil. Li Jesuse stsakojbe skʼob, xchiʼuk noxtok te nopol oyik li stot smeʼ li tsebe. ¿Mi xa naʼ kʼu yuʼun xmuyubajik tajek? Jkʼeltikik.

Li stot tsebe jaʼ jun vinik ti lek ojtikinbile, jaʼ sbi Jairo. Jun velta li tsebe iʼipaj, vaʼun la xpuchʼanik ta tem. Pe muʼyuk bu xlekub, kʼajomal noʼox yantik x-ipaj batel. Li Jairo xchiʼuk li yajnile ta xat tajek yoʼontonik, yuʼun ta xcham yileluk li yuni tsebike. Kʼajomal noʼox jun stsebik. Jech oxal li Jairoe bat saʼ li Jesuse. Yuʼun yabinojbe skʼoplal li skʼelobiltak juʼelal tspas li Jesuse.

Kʼalaluk kʼot Jairo ti bu oy li Jesuse, ep te tsobol krixchanoetik la sta. Pe li Jairoe la xchʼik sba jelavel, vaʼun la spatan sba ta yok li Jesuse. Li jtsebe toj ip, xi. Laʼ, avokoluk, laʼ poxtao, xut. Li Jesuse la jyal ti chbate.

Kʼalal yakalik ta xanvile, li krixchanoetike snetʼnetʼ sbaik sventa chnopajik batel ta stojolal li Jesuse. Vaʼun li Jesuse paj ta xanvil. Xi la sjakʼe: ¿Buchʼu la spikun?, xi. Yuʼun la jyaʼi lokʼ juʼelal ta stojolal, xchiʼuk noxtok snaʼoj ti oy buchʼu pikvane. Pe ¿buchʼu? Jaʼ jun ants ti oy xa ta xlajchebal jabil yipajele. ¡Tal ta stojolal Jesús xchiʼuk la spikbe li skʼuʼe, vaʼun jech poxtaj!

Taje jaʼ la spat-o yoʼonton li Jairoe, yuʼun la jyakʼ venta ti mu tsotsuk ta xaʼi Jesús xpoxtael jun krixchanoe. Pe te vul jun j-ichʼ kʼop. Mu xa xa vakʼbe svokol li Jesuse. Yuʼun cham xa li atsebe, x-utat li Jairoe. Li Jesuse la jyaʼi, vaʼun xi la jyalbe li Jairoe: Mu xa vat avoʼonton; ta xpoxtaj li atsebe, xut.

Kʼalaluk kʼotik ta sna li Jairoe, li krixchanoetike ta x-okʼik yuʼun ta xat tajek yoʼontonik. Pe xi la jyal li Jesuse: Mu xa okʼik. Li tsebe muʼyuk bu chamem. Kʼajomal noʼox ta xvay, xi. Pe li krixchanoetike lik stseʼintaik xchiʼuk lik slabanik li Jesuse, yuʼun snaʼojik ti chamem xa li uni tsebe.

Vaʼun li Jesuse, xchiʼuk oxvoʼ yajtakboltak xchiʼuk stot smeʼ li uni tsebe ochik batel ti bu oy li uni tsebe. La stsakbe skʼob xchiʼuk xi la jyalbee: ¡Likan!, xut. Li uni tsebe chaʼkuxi, jech kʼuchaʼal chvinaj ta lokʼole. ¡Lik totsuk xchiʼuk lik xanavuk! Jaʼ yuʼun xmuyubajik tajek li stot xchiʼuk li smeʼe.

Li uni tsebe maʼuk ti buchʼu baʼyel la jyichʼ chaʼkuxesel yuʼun li Jesuse. Li buchʼu baʼyel la jyichʼ chaʼkuxesele chaʼa jaʼ jun skerem meʼon ants ti te nakal ta jteklum Naine. Ta tsʼakal, li Jesuse la xchaʼkuxes Lázaro, li xchiʼil ta vokʼel María xchiʼuk Martae. Kʼalal mi ch-ajvalilaj li Jesús ti tʼujbil yuʼun Diose, ta xchaʼkuxes epal krixchanoetik. ¿Mi mu tauk xi jmuyubaj-o yuʼun taje?