Tantara 92

Jesosy Namelon̈o Olo Maty

FOLO aroe amby taon̈o tsaiky man̈angy io. Jesosy mitana tan̈anany io, baka iô mamany ndreky babany mitsangana io. Hainao nan̈ino irô ravoravo? Alô zahavatsika.

Jairo an̈aran̈a baban’ny tsaiky io, olo najain̈y tamy leran’izen̈y. Andra araiky zanany narary, napetraka tan̈abo kibàny. Kanefa izy tsy nety nahivan̈a. Nahaifatatra fo aretin̈inany. Jairo ndreky vadiny niasa loha, fôtony tsaiky io tamy zen̈y karaha fa hofoaty. Izy zaraiky fo baka zanakan-drô man̈angy. Ke Jairo nandeha nitady Jesosy, fôtony izy naharen̈y fa Jesosy nahavita fahagagan̈a.

Jairo koa fa nahita Jesosy, zahavany olo marobe mivory aminany. Kanefa Jairo namakivaky olo marobe in̈y, baka iô nantaoraka tamy vitin’i Jesosy. Izy nivolan̈a: ‘Zanako man̈angy marary fatatra. Zaho mba mangataka anao handeha aminay an̈y hitaha izy.’ Jesosy nety.

Irô koa fa nandeha, olo nahainan̈aton̈o fo. Tiô fo Jesosy nijanon̈o. Izy nan̈ontany: ‘Azôvy nitosy zaho tiô in̈y?’ Jesosy naharen̈y fa nisy angôvo niala taminany, ke hainy fa nisy olo nitosy izy. Azôvy izio? Izio man̈angy araiky narary efa nisy 12 taon̈o zay. Izy nan̈aton̈o, baka iô nitosy lamban’i Jesosy. Izy baka tiô janga!

Jairo ravoravo nahita izin̈y, fôtony natoky izy fa tsy sarotro tamy Jesosy mitaha olo. Kanefa, nisy mpitaondra hafatra navy. Izy nivolan̈a tamy Jairo: ‘Anao kaza manahiran̈a Jesosy eky, fa zanakanao fa maty.’ Jesosy fa nahay zen̈y, ke izy nivolan̈a tamy Jairo: ‘Anao kaza miasa loha, fa izy hahivan̈a.’

Irô amy zay koa fa navy tamy tran̈on’i Jairo tan̈y, olo jiaby niafatrafatra nitomoan̈y. Jesosy nivolan̈a: ‘Anarô kaza mitomoan̈y. Tsaiky io tsy maty fa matôro fo.’ Irô nitokiky Jesosy, fôtony hain-drô fa tsaiky io maty.

Jesosy amy zay nitaondra baban’ny tsaiky io ndreky mamany, aviô apostolinany telo nandeha tamy tran̈o nisy faty io. Izy nitana tan̈an’ny tsaiky io, baka iô nivolan̈a: ‘Mifohaza!’ Izy baka tiô velon̈o, karaha hitanao amy sary io. Izy nifaoha, baka iô nandeha! Zen̈y namparavoravo mamany ndreky babany io.

Tsy io olo voanalohany nivilômin’i Jesosy. Baiboly mivolan̈a fa zanaka man̈angy maty vady nipetraka ta Naina olo voanalohany nivilôminy. Tsy elan’izin̈y koa, izy namelon̈o Lazarosy, anadahin’i Maria ndreky Marta. Jesosy ampanjaka nifidin’ny Zan̈ahary. Ke lera izy mitaondra, olo maro efa naty aby in̈y hivilôminy. Mamparavoravo atsika zen̈y, sa karakôry?

Lioka 8:40-56; 7:11-17; Jaona 11:17-44.