MWALI jwakum’wona apanoju akwete yaka 12. Yesu amkamwile mkono, soni mamagwe ni babagwe ajimi ciŵandika jwalakwe. Ana akumanyilila ligongo lyakwe ŵanduŵa akuwoneka kuŵa ŵakusengwa mnope? Kwende tulole.

Babagwe mwaliju ali mundu jwakumanyika mnope, lina lyawo ali Yailo. Lisiku line mwanagwawoju ŵalwasile, ni ŵam’gonece. Nambope ngakusimana cenene. Ulwelewo ugamba kwendelecela. Yailo ni ŵamkwakwe ali ŵacanasa mnope, ligongo mwanagwawojo akuwoneka kuti cawe. Jemanjaji akwete mwanace jumopeju basi. M’yoyo Yailo akwawula kukumsosasosa Yesu. Jwalakwe apikene yakusimonjesya yakutenda Yesu.

Yailo akumsimana Yesu pa likuga lyekulungwa lya ŵandu lili limsungulile. Nambo Yailo akupita mu likuga lila ni akumtindiŵalila Yesu, nikuŵenda kuti: ‘Mwanangu akulwala mnope, conde ayice kuti amlamisye.’ Yesu akwanga kuti cajawuleko.

Pakwenda yimpepe, ŵandu akwamba kututanatutana kuti aŵandicile kwali Yesu. Mwakusisimucisya Yesu akwima. Ni akuwusya kuti: ‘Nduni jwangwayiye? Yesu ŵapikene kuti macili gakwe gakopwece mwa jwalakwe, m’yoyo jwalakwe akumanyilila kuti jwine jwakwe amkwayiye. Nambo ali nduni? Ali jwamkongwe jwaŵele ali mkulwala mnope kwa yaka 12. Jwalakwe ŵapite kukukwaya yakuwala ya Yesu ni ŵaposile!

Yeleyi yikumtendekasya Yailo kupikana cenene, ligongo akuyiwona kuti Yesu ngayikumsawusya kumposya mundu. Nambo kaneko akwisa mundu jwine ni utenga. Jwalakwe akumsalila Yailo kuti: ‘Akamsawusyasoni Yesu, mwanagwawo awile.’ Yesu akupikana yeleyi ni akumsalila Yailo kuti: ‘Mkadandawula, caŵe cenene.’

Pakukopocela panyumba ja Yailo, ŵandu akulila mwakutesya canasa mnope. Nambo Yesu akwasalila kuti: ‘Akalila. Mwanaceju nganawa. Jwalakwe agambile gona.’ Nambo jemanjajo akumseka, soni kumnyosya, ligongo akumanyilila kuti mwanacejo awile.

Kaneko Yesu akwajigalila babagwe mwanacejo ni mamagwe, soni ŵandumetume ŵakwe ŵatatu m’cipinda camgonece mwanacejo. Jwalakwe akumkamula pamkono ni kuŵeceta kuti: ‘Mjimuce!’ Ni mwanacejo akuŵa cijumi, mpela mwakuyiwonela apano. Jwalakwe akwimuka ni kwendaga! Ni ligongo lyakwe mamagwe, soni babagwewo akuŵa ŵakusengwa kwamnope.

Jweleju ngaŵa mundu jwandanda Yesu kumjimusya kwa ŵawe. Baibulo jikulosya kuti jwandanda ŵaliji mwanace jwa jwamkongwe jwamasije juŵatamaga mu msinda wa Naini. Kaneko, Yesu ŵamjimwisye ku ciwa Lasalo, mlumbugwawo Maliya ni Malita. Yesu pacacilamulilaga mpela mwenye jwa Ucimwene wa Mlungu, cacajimusya ŵandu ŵajinji kuti akolesoni umi. Ana yeleyi ngaŵa yakusangalasya?