LE CHAN x-chʼúupalaʼ yaan 12 jaʼab tiʼ. Machaʼan u kʼab tumen Jesús, le yanoʼob yiknaloʼ u mama yéetel u taata. ¿A wojel wa baʼaxten jach kiʼimak yóoloʼob? Koʼox ilik.

U taata le chan x-chʼúupalaʼ Jairo, utúul máak jach kʼaj óolaʼan. Upʼéel u kʼiinileʼ kʼojaʼanchaj le chan x-chʼúupalaʼ, ka chikúuntaʼab tu kúuchil u wenel. Baʼaleʼ joʼopʼ u bin u maas kʼojaʼantal. Jairo túun yéetel u yataneʼ jach chiʼichnakchajoʼob, tumen le chan x-chʼúupaloʼ jach táan kaʼach u kíimil. Tsʼoʼoleʼ minaʼan uláakʼ u paalaloʼob. Le beetik Jairoeʼ bin u yil Jesús. Letiʼeʼ tsʼoʼok u yuʼubik u tsikbalil le nukuch baʼaloʼob ku beetik Jesusoʼ.

Ka kʼuch Jairoeʼ, Jesuseʼ baʼpachtaʼan tumen yaʼabach máakoʼob. Baʼaleʼ, Jairoeʼ máan chúumuk tiʼobeʼ ka xolaj yiknal u yook Jesús. Ka tiaʼalajtiʼ: In paaleʼ jach kʼojaʼan, beet uts a taal ka tsʼake. Jesús túuneʼ tiaʼalajtiʼ jeʼel u bineʼ.

Le táan u binoʼoboʼ, yaʼabach máak ku bin u tutulchʼinkubaʼob yoʼolal u náatsʼloʼob yiknal Jesús. Chéen ka jáan jeʼel Jesuseʼ, ka tu kʼáataj: ¿Máax machen? Jesuseʼ tu yuʼubaj yaan u muukʼ lukʼij, le beetik u yojel yaan máax machej. Baʼaleʼ ¿máax túun? Utúul koʼolel tsʼoʼok doce jaʼab kʼojaʼanchajak. ¡Náatsʼeʼ, ka tu machaj u nookʼ Jesús, ka túun utschaji!

Lelaʼ tu líiʼsaj yóol Jairo, tumen tu yileʼ Jesuseʼ ku páajtal u tsʼakik le kʼojaʼanoʼoboʼ. Baʼaleʼ taasaʼab le kʼuben tʼaan tiʼ Jairoaʼ: Maʼ chéen beetik u taal Jesús, a paaleʼ tsʼoʼok u kíimil. Jesuseʼ tu yuʼubaj lelaʼ, ka tiaʼalaj tiʼ Jairo: Maʼ chiʼichnaktal; letiʼeʼ yaan u yutstal.

Ka kʼuchoʼob tu yotoch Jairoeʼ, le máakoʼoboʼ táan u sen okʼoloʼob. Baʼaleʼ Jesuseʼ tiaʼalajtiʼob: Maʼ wokʼoleʼex. Le chan x-chʼúupaloʼ maʼ kimeniʼ. Chéen táan u wenel. Letiʼobeʼ tu cheʼejtoʼob yéetel tu pʼaʼastoʼob Jesús, tumen yojloʼob kimen le chan x-chʼúupaloʼ.

Jesús túuneʼ ook yéetel u taataʼob le chan x-chʼúupaloʼ bey xan yéetel óoxtúul u apóstoloʼob teʼ cuarto tuʼux yaan le chan x-chʼúupaloʼ. Letiʼeʼ tu machaj tu kʼabeʼ ka tiaʼalajtiʼ: ¡Líikʼen! Letiʼ túuneʼ kaʼa kuxlaji, jeʼex a wilik teʼelaʼ. ¡Líikʼeʼ ka xíimbalnaji! Le beetik jach kiʼimakchaj u yóol u taata yéetel u mama.

Baʼaleʼ maʼ letiʼe máax yáax líiʼsaʼab ichil le kimenoʼob tumen Jesusoʼ. Le yáaxoʼ, u paal utúul koʼolel kajaʼan Naín, kimen u yíicham. Ka tsʼoʼokeʼ Jesuseʼ tu kaʼa kuxkíintaj xan Lázaro, u sukuʼun María yéetel Marta. Ken gobernarnak Jesús, le rey yéeyaʼan tumen Diosoʼ, yaan u kaʼa kuxkíintik yaʼabach máakoʼob. Leloʼ, ¿maʼ wa táan u kiʼimakkúuntik k-óol?