MBIOXGONAʼYEN ni rabilo reʼ napbu 12 íz. Ni nanás ñabu ngú Jesús, né ni noʼ gahx ronoʼbu ngú xinaʼbu né bixiosbu. ¿Nanlo xigony nigolú rabaladxyibu la? Guibino guidoni.

Bixios mbioxgonaʼyen reʼ nac toib buñxirop ni laa Jairo. Toibtica dzú xiindzapyenbu bixoʼ, né godiʼxbu xiindzapyenbu ló loʼon. Per diti rialbu, conforma godudy dzú góc xiroʼ xcalguitzbu. Jairo né tzeʼel nigolú rioʼyibu ló galrasaʼ, portín ralooypani gaity nidxigonaʼyen reʼ. Mbioxgonaʼyen reʼ nac xiindzap guielótbu. Por ngú Jairo riée rayopy Jesús. Láabu ma bicadiagbu guirá galrradziguiaʼ ni rony Jesús.

Órni radxinbu ronoʼ Jesús, nagoo xidalguixo buñ láabu. Per Jairo radudy lad guirá buñreʼ né raxixip nislóbu. Jairo raiby láabu: Xiindzapa nigolú caxoʼ. Ranába lólo, godaʼ né bisial láabu. Jesús rasaguel.

Laʼga casaayibu, xidalguixo buñ ni noʼ lagarycu ragaʼny saʼ par guibigax ronoʼ Jesús. Tisintiempsi Jesús rasagadzu né ranabdiitz: ¿Chú láabu godan naʼ? Jesús biduidy cuent que de láabu bireʼ galnadip, né goníbu que noʼ ni godan láabu. Per ¿chú buny ndeʼ? Ndeʼ nac toib buñgonaʼ ni caxoʼ né ma napbu doce íz né galguitz reʼ. ¡Bieedbu né godanbu xhap Jesús, né bialbu!

Órni Jairo rabí ndeʼ rasac sacróbu, portín raduidybu cuent que par Jesús diti nagann guisialbu buñ. Per ór cú rieed toib buñguieeu ni raduidy abís láabu né raniʼ: Diti cuélo xchiin Jesús. Xiindzaplo ma goity. Jesús racadiag ndeʼ né raibybu Jairo: Diti tzólo ló galrasaʼ, láabu sioʼbu sacró.

Órni bidxinyibu lidx Jairo, buñ dxee nigolú ribdxaʼdoot. Per Jesús raiby layibu: Diti cudxaʼto. Mbioxgonaʼyen reʼ diti ma goity. Nosi natiasybu. Per layibu raxiichyibu né ronyibu borla Jesús, portín nanyibu que mbioxgonaʼyen reʼ ma goity.

Ór cú Jesús né tzón xpiin, xinaʼ né bixios nidxigonaʼyen reʼ rioʼyibu ro náaxh gueʼet reʼ. Jesús ranás ñabu né ranibu: ¡Biás! Né nidxigonaʼyen reʼ rabany stoib, xomod rabilo ló dibuj. ¡Riásbu né rasaabu! Por ngú bixiosbu né xinaʼbu nigolú rabaladxyibu.

Ndeʼ diti nac primer buñ ni Jesús ralís lad gueʼet. Ni primer golísbu ngú xiin toib viod ni golés lainy gudx Naín. Después Jesús láaca ralís Lázaro, bisan María né Marta. Órni Jesús gony mandary lainy Gobierno xtuny Dios, salísbu xidalguixo buñ. ¿Diti rabaladxno por ni gonybu la?