ENYENE NDỊK n̄kpọ otịbe. Ẹwot John Baptist ibịghike. He·roʹdi·as, n̄wan edidem, ikamaha enye. Ndien enye ama ekeme ndinam edidem anam ẹsịbe John ibuot.

Ke Jesus okopde emi, enye ọfụhọ etieti. Enye adaha ndobo itie ikpọn̄. Edi mme owo ẹtiene enye. Ke Jesus okụtde otu mme owo oro, enye atua mmọ mbọm. Ntre enye asian mmọ aban̄a obio ubọn̄ Abasi, ndien enye ọkọk mbon udọn̄ọ ke otu mmọ.

Mbubreyo oro, mme mbet ẹtiene enye ẹdidọhọ: ‘Eyo okụt, ndien itie emi odobo. Dọhọ mme owo ẹnyọn̄ man ẹkpedep udia mmọ ke n̄kpri obio emi ẹkperede.’

Jesus ọbọrọ ete, ‘Inaha mmọ ẹnyọn̄.’ ‘Mbufo ẹnọ mmọ n̄kpọ ẹdia.’ Ke esede Philip, Jesus ọdọhọ: ‘Ke mmọn̄ ke nnyịn ikeme ndidep udia oro ẹdikemde ofụri owo emi?’

Philip ọbọrọ, ‘Eyetak uwak okụk ndidep se kpukpru owo ẹkam ẹdiade esisịt.’ Andrew etịn̄ ete: ‘Eyenọwọn̄ emi akamade udia nnyịn, enyene ebok uyo ition ye iyak iba.’ Edi idikemke kem ofụri owo emi.’

Jesus ete, ‘Dọhọ mme owo etie ke mbiet oro.’ Ndien enye ọkọm Abasi ke udia oro, onyụn̄ ọtọn̄ọ ndibụn̄ enye ke mbak. Ndien, mme mbet ẹnọ kpukpru owo oro uyo ye iyak oro. Mmọ edi irenowo 5,000 ye uwak tọsịn iban ye nditọn̄wọn̄ efen. Kpukpru mmọ ẹdia tutu ẹyụhọ. Ndien ke mme mbet ẹtan̄de n̄ken̄e ẹbok, mmọ ẹyọhọ akpasa duopeba!

Jesus ke emi ọdọhọ mme mbet esie ẹdụk ubom ẹsan̄a ẹbe Inyan̄ Galʹi·lee. Ke okoneyo, akwa oyobio otịbe, ndien mbufụt inyan̄ otop ubom oro ọnọ n̄kan̄ emi ye eken. Mme mbet ẹnen̄ede ẹkop ndịk. Ndien ke ufọt okoneyo, mmọ ẹkụt owo asan̄ade ke enyọn̄ mmọn̄ etiene mmọ. Mmọ ẹfiori ke ndịk, koro mmọ mifiọkke se mmọ ẹkụtde.

Jesus ọdọhọ ete, ‘Ẹkufehe ndịk. Edi ami!’ Mmọ isụk inịmke ke akpanikọ. Ntre Peter ete: ‘Edieke ke akpan edide afo, Ọbọn̄, dọhọ mi nsan̄a ke enyọn̄ mmọn̄ ntiene fi.’ Jesus ọbọrọ: ‘Di!’ Ndien Peter ọwọrọ asan̄a ke enyọn̄ mmọn̄! Edi enye okop ndịk onyụn̄ ọtọn̄ọ ndiden̄, edi Jesus an̄wam enye.

Ekem, Jesus afiak ọbọk uwak tọsịn owo. Isan̄ emi enye anam ntre ye ebok uyo itiaba ye n̄kpri iyak miwakke. N̄ko ekese odu ọnọ kpukpru owo. Nte idịghe n̄kpọ n̄kpaidem nte Jesus esede aban̄a mme owo? Ke ini enye akarade nte edidem Abasi, nnyịn idifịnake iban̄a n̄kpọ ndomokiet!