GAU dikana ta ia vara. Ioane Bapatiso be idia hamasea vadaeni. King ena adavana, Herodia, ese Ioane ia ura henia lasi. Bona iena ura dainai king ese gwaumaoro ia henia Ioane ena kwarana idia utua totona.

Iesu be unai ia kamonai neganai, ia lalohisihisi bada. Taunimanima idia noho lasi gabuna dekenai ia lao. To taunimanima ese ia idia badinaia. Iesu ese hutuma ia itaia neganai ia hebogahisi henidia. Unai dainai idia dekenai Dirava ena basileia ia herevalaia, bona gorere taudia ia hanamodia.

Unai adorahi ai ena hahediba taudia be ia dekenai idia mai bona idia gwau: ‘Dina be ia diho vadaeni, bona inai gabu dekenai taunimanima idia noho lasi. Taunimanima oi siaia lao, unai amo kahirakahira ia noho hanuadia dekenai edia aniani idia hoia diba.’

Iesu ia haere: ‘Idia lao lasi danu be namo. Umui ese idia dekenai aniani umui henia.’ Iesu be Filipo dekenai ia giroa bona ia nanadaia: ‘Inai taunimanima ibounai ubua totona aniani be edeseni do ita hoia diba?’

Filipo ia haere: ‘Ena be moni bada herea do ita negea, to taunimanima ibounai be sisina sisina sibona do idia ania.’ Andrea ia hereva: ‘Iseda aniani ia huaia merona be mai ena paraoa 5 bona gwarume rua. To unai be hegeregere lasi taunimanima ibounai totona.’

Iesu ia gwau: ‘Taunimanima umui hamaoroa rei dekenai do idia helai diho.’ Bena aniani totona Dirava ia tanikiu henia, bena ia makohia maragimaragi. Gabeai, hahediba taudia ese paraoa bona gwarume be taunimanima ibounai dekenai idia henia. Unuseniai tatau be 5,000 bona hahine bona natudia tausen momo idia noho. Idia ibounai idia aniani ela bona idia bogakunu. Bona hahediba taudia ese aniani orena idia haboua neganai, bosea 12 idia hahonua!

Bena Iesu ena hahediba taudia be bouti ta dekenai idia guia bona Galilea Gohuna idia hanaia. Hanuaboi huanai lai gubana ia mai, bona hurehure ese bouti ia tahoa lao, tahoa mai. Hahediba taudia be idia gari bada. Bena, hanuaboi huanai, tau ta idia itaia, davara ena kopina latanai ia raka mai. Idia boiboi mai gari danu, badina idia itaia gauna idia diba lasi.

Iesu ia gwau: ‘Umui gari lasi. Inai be lau!’ To idia abia dae lasi. Unai dainai Petero ia gwau: ‘Lohiabada e, bema momokani inai be oi, lau oi hamaoroa ranu ena kopina latanai dekenai do lau raka mai.’ Iesu ia gwau: ‘Oi mai!’ Bona Petero ia diho bona davara ena kopina latanai ia raka! Bena ia gari bona ia mutu matamaia, to Iesu ese ia hamauria.

Gabeai, Iesu ese taunimanima tausen momo ma ia ubua lou. Unai negai paraoa 7 bona gwarume maragidia haida amo ia ubudia. Bona aniani be momo herea, guna bamona. Iesu ese taunimanima ia naridia dalana be namo herea, ani? Dirava ena king bamona do ia lohia neganai, gau ta dekenai do ita lalo-hekwarahi lasi!