Jesus ma parura ovandu ovengi
EHUNGI 93
Jesus ma parura ovandu ovengi
PA TJITWA otjiṋa otjitirise. Johanes Omupapitise wa za nokuzepewa. Herodias omukazendu wombara kee mu vanga. Neye wa yenena okupopa ombara kutja i kondise otjiuru tjaJohanes.
Indu Jesus tja raerwa ohunga notjiṋa hi, eye wa hihamwa omutima tjinene. Eye wa ya koṋa ka kakara erike. Nungwari ovandu ve mu kongorera. Indu Jesus tja muna otjimbumba tjovandu, eye wa ṱondjenda nawo. Okutja eye wa hungira ku nawo ohunga nouhona waMukuru, na verura ovavere vawo.
Ongurova ndjo ovahongewa ve ve ya ku ye nave tja: ‘Eyuva ra toko, nu imwi omokuti. Raera ovandu kutja ve yaruke kovirongo ve kerirandere ovikurya.’
Jesus we ve zira na tja: ‘Owo kave nokuhepa okuyenda, eṋe ve peye ovikurya ve rye.’ Jesus wa taviza ku Filipus ne mu pura: ‘Matu yenene okuranda pi ovikurya mbi matu hire movandu avehe mba?’
Filipus we mu zira na tja: ‘Ma pe hepa ovimariva ovingi tjinene okuranda ovikurya mbi mavi yenene kokutja omundu auhe ma mune oukurya ouṱiṱi.’ Andreas arire tja tja: ‘Omuzandona ngwi, ngwa tjindi ovikurya vyetu, u nozomboroto ndano nomahundju yevari. Nungwari kamaavi yenene nandarire kaṱiṱi kovandu avehe mba.’
Jesus arire tja tja: ‘Raereye ovandu avehe kutja ngave haame kombanda yehozu.’ Okuzambo wa tja okuhepa ku Mukuru kovikurya, na utu okuvihaṋa moutupa ouṱiṱi. Okuzambo ovahongewa va yandja ozomboroto nomahundju kovandu avehe. Opo pa ri ovarumendu 5 000, novakazendu novanatje omayovi omengi wina. Owo avehe va rya ngandu tji ve kuta. Nu ovahongewa tji va wonga ovikurya ovihupe, ve urisa ovimbamba 12!
Okuzambo Jesus wa raera ovahongewa ve kutja ngave ronde motjiyaha tjomomeva nu ve konde omuronga waGalilea. Mokati kouṱuku otjivepo otjinamasa tja sekama, nozongazona aaze yumbu otjiyaha munda na munda. Ovahongewa va urumine tjinene. Okuzambo, mokati kouṱuku, owo va muna omundu ngwaa wondjo kombanda yomeva okuya ku wo. Owo va ura momburuma, mena rokutja owo kaave tjiwa kutja otjikeṋa tjaave munu.
Jesus arire tja tja: ‘Amu tira, owami!’ Owo ngunda kaave kambura. Okutja Petrus arire tja tja: ‘Muhona tjinangara tjiri oove, ndji raera mbi ye kove ame wondjo kombanda yomeva.’ Jesus we mu zira na tja: ‘Indjo!’ Petrus opa herukira na kawondja kombanda yomeva! Okuzambo eye arire tja tira na utu okuṱomwina momeva, nungwari Jesus we mu yama.
Kombunda, Jesus wa parura ovandu omayovi rukwao. Otjikando tji eye we ve parura nozomboroto hambombari nouhundju tjiva ouṱiṱi. Nu rukwao pa ri ovikurya ovingi ku avehe. Katjiṋa otjiwa nao omuano Jesus mbwaa tjindi ovandu? Indu eye tji ma kahonapara otjombara eṱe katu nokuhepa okurikenda ohunga notjiṋa kangamwa!
