Ɛisa issečč izumal n lɣaci
TAQSIṬ TIS 93
Ɛisa issečč izumal n lɣaci
TEḌRA yiwet n twaɣit ţ-ţameqrant! Atan akken kan i nɣan Yeḥya aɣeṭṭas. Hiṛudyad yellan ţ-ţameṭṭut n ugellid ur t-tḥemmel ara. Tḥettem ihi argaz-is iwakken ad igzem aqerru n Yeḥya.
Mi gesla s lmut n Yeḥya, Ɛisa yeḥzen aṭas. Iṛuḥ ihi ɣer yiwen wemḍiq iwakken ad iḍerref iman-is. Lameɛna lɣaci tebɛen-t armi d amkan-nni. Mi gwala ahdum-agi n lɣaci, tegzem tasa-s. Dɣa yebda iţmeslay-asen ɣef Tgelda n Ṛebbi yerna yesseḥlay imuḍan-nsen.
Mi geɣli yiṭij, inelmaden-is qerrben ɣur-es, nnan-as: ‘Amkan-agi yexla yerna iṛuḥ lḥal. Ini i lɣaci-yagi ad ṛuḥen ɣer tudrin iwakken a d-aɣen ayen ara ččen.’
Ɛisa yerra-yasen: ‘Acuɣer ara ṛuḥen? Fket-asen kunwi ad ččen.’ Imiren yezzi ɣer Filbas, yenna-yas: ‘Ansi ara d-naɣ aɣrum i wannect-agi n lɣaci?’
Filbas yerra-yas: ‘Laqen geddac n yedrimen iwakken a d-iṣaḥ ciṭuḥ kan n weɣrum mkul yiwen deg-sen.’ Andriyus yenṭeq ɣer Ɛisa yenna-yas: ‘Aqcic-inna yeţţawin lqut-nneɣ yesɛa xemsa n teḥbulin n weɣrum akk-d sin iḥutiwen. Lameɛna ur d-ţqiddin ara i wannect-agi n lɣaci.’
Ɛisa yumeṛ i inelmaden-is: ‘Init i lɣaci ad qqimen ɣef leḥcic.’ Mbeɛd, Ɛisa yeddem-ed lqut-nni, yeḥmed Ṛebbi icekkeṛ-it, dɣa yebḍa-t d iḥricen. Inelmaden-is ferqen ihi tiḥbulin-nni n weɣrum d iselman-nni i lɣaci. Ger wid yeččan, llan 5000 n yergazen mebla luluf n tlawin d warrac imecṭaḥ. Ččan akk armi ṛwan yerna gran-d 12 iḍellaɛen i d-jemɛen inelmaden n Ɛisa.
Mbeɛd Ɛisa iḥreṣ inelmaden-is ad alin ɣer teflukt iwakken ad zegren i lebḥeṛ n Jlili. Mi d-yeɣli yiḍ, tekker-ed yiwet n tbuciḍant annect n leɛǧeb. Lemwaji kkatent taflukt-nni si mkul tama. Inelmaden n Ɛisa tekcem-iten tugdi tameqrant. Mi gneṣṣef yiḍ, walan albeɛḍ iteddu-d ɣur-sen, ileḥḥu ɣef waman. Dɣa bdan ţɛeggiḍen si lxuf axaṭer ur ɛqilen ara anwa-t wagi.
Ɛisa yenna-yasen: ‘Ur ţţagadet ara, d nekk!’ Lameɛna ggumman ad amnen annect-a. Dɣa Buṭrus yenna-yas: ‘A Sidi, ma yella d ṣṣeḥ d keččini, efk-iyi-d lameṛ a n-aseɣ ɣur-ek ɣef waman.’ Ɛisa yerra-yas: ‘Eyya-d!’ Buṭrus yers-ed ihi si teflukt, yebda ileḥḥu ɣef waman! Lameɛna ikcem-it lxuf, dɣa yebda izedder. Imiren kan isellek-it-id Ɛisa.
Iɛedda cwiṭ n lweqt, Ɛisa yessečč tikkelt nniḍen luluf n yemdanen. S sebɛa n teḥbulin n weɣrum d kra n iselman imecṭaḥ i gexdem aya. Lɣaci meṛṛa ččan diɣen armi ṛwan. Bla ccekk nefṛeḥ m’akka i nwala lxiṛ meṛṛa yexdem Ɛisa i lɣaci! Asm’ara yili d agellid, ulac ayen ara ɣ-ixaṣṣen.
Matta 14:1-32; 15:29-38; Yuḥenna 6:1-21.
