Ngewa ya 93: Yesũ Ainenga Andũ Aingĩ Lĩu
ŨNDŨ mũthũku mũno nĩwĩkĩkie. Yoana ũla Mũvatisi aĩ anooawa. Elotia mũka wa mũsumbĩ ndamwendete Yoana. Na nĩwavangie nĩ kana mũsumbĩ atile mũtwe wake.
Yĩla Yesũ weewie ũndũ ũsu, nĩwaũũyie mũno. Na athi vandũ vate andũ angĩ nĩ kana ethĩwe e weka. Ĩndĩ andũ mamũatĩĩa. Yesũ oona ĩkomano yĩu ĩnene ya andũ, amew’ĩa tei. Kwoou aneena namo ĩũlũ wa ũsumbĩ wa Ngai, na avosya awau moo.
Mũthenya ũsu mawĩoo amanyĩw’a make nĩmookie vala ũĩ na masya: ‘Nĩkwambĩĩa kũtuka na vaa nĩ weũnĩ. Eka andũ mathi nĩ kana makethooee lĩu ndũanĩ ila syĩ vakuvĩ.
Nake Yesũ asũngĩa: ‘Mati na vata wa kũthi. Manengei kĩndũ maye.’ Na ĩndĩ eethyũũa kwelekela Vilivu na amũkũlya: ‘Tũtonya kũthooa lĩu va ũtoetye andũ aa onthe
Nake Vilivu asũngĩa: ‘Twĩtũmĩa mbesa mbingĩ mũno vyũ kũthooa lĩu ũtoetye kĩla mũndũ kũkwata o kanini.’ Nake Andalea asya: ‘Kamwana kaa kena mĩkate ĩtano na makũyũ elĩ. Ĩndĩ o na iitonya kũthengeea kwĩana andũ aa onthe.’
Ĩndĩ Yesũ asya: ‘Ĩai andũ nĩmekale nthĩ nyekinĩ.’ Nake atũngĩa Ngai mũvea nũndũ wa lĩu ũsu, na ambĩĩa kũũtilanga ilungu. Na amanyĩw’a mamanenga andũ asu onthe mĩkate na makũyũ asu. Vaĩ aũme 5,000, na aka ngili mbingĩ na syana. Onthe maĩe mavũna. Na yĩla amanyĩw’a moosanisye lĩu ũla watialile, wausũa ikavũ 12!
Ĩndĩno Yesũ eea amanyĩw’a make malike ngalawanĩ mainge Ũkanga wa Kalilii. Ũtukũ ũsu kĩuutani kĩnene nĩkyookie, na itulumo sya ũkanga syamĩthakya ngalawa kũũ na kũũ. Amanyĩw’a maĩ na w’ĩa mũno. Na ĩndĩ, ũtukũ katĩ, moona mũndũ okĩte na kũla maĩ akinyĩle kĩw’ũnĩ ĩũlũ. Namo makaya nĩ w’ĩa, nũndũ mayeesĩ kĩu mene nĩ kyaũ.
Nĩvo ĩndĩ Yesũ wameie: ‘Mũikakĩe. Ninyie!’ Ĩndĩ mayaaĩkĩĩa. Kwoou Vetelo asya: ‘Ethĩwa nũe kwa w’o, Mwĩaĩi, mbĩa nũke vala ũĩ nginyĩle kĩw’ũnĩ ĩũlũ.’ Nake Yesũ amwĩa: ‘Ũka!’ Na Vetelo auma ngalawanĩ, na akinyĩla kĩw’ũnĩ ĩũlũ! Ĩndĩ akwatwa nĩ w’ĩa na ambĩĩa kũlika kĩw’ũnĩ, ĩndĩ Yesũ amũtangĩĩa.
Na ĩtina, Yesũ nĩwamanengie lĩu andũ angĩ ngili mbingĩ. Ĩvinda yĩu atũmĩie mĩkate mũonza na tũkũyũ tũnini. Na ĩvinda yĩu o nayo vaĩ lĩu wa kũvũny’a andũ onthe. Yesũ asũvĩaa andũ kwa nzĩa ya ũsengy’a mũno. Yĩla ũkasumbĩka e mũsumbĩ mwie nĩ Ngai, tũikathĩnw’a nĩ kĩndũ nongi!
Mathayo 14:1-32; 15:29-38; Yoana 6:1-21.
Makũlyo
- Nũndũ mwaũ mũthũku wamũkwatie Yoana Mũvatisi, naw’o watumie Yesũ ew’a ata?
- Yesũ amanengie lĩu ata andũ aingĩ ala mamũatĩĩe, na nĩ lĩu wĩana ata watialile?
- Nĩkĩ amanyĩw’a meew’aa w’ĩa ũtukũ, na Vetelo akwatiwe nĩ kyaũ?
- Yesũ amanengie lĩu ata andũ ngilĩ mbingĩ ĩvinda ya kelĩ?
- Nĩkĩ kũkethĩwa kwĩ kũseo mũno yĩla Yesũ ũkasũmbĩka nthĩ e Mũsumbĩ wiĩtwe nĩ Ngai?
Makũlyo ma kwongeleela
- Soma Mathayo 14:1-32.
Ũvoo ũla wĩ nthĩnĩ wa Mathayo 14:23-32 wĩtũtetheesya ata kũmanya ũmũndũ wa Vetelo?
Maandĩko meonany’a ata kana Vetelo nĩwaimie kĩveva na aeka kwĩka maũndũ atambĩte kwĩsilya? (Mt. 14:27-30; Yoa. 18:10; 21:7; Meko 2:14, 37-40; 1 Vet. 5:6, 10)
- Soma Mathayo 15:29-38.
Yesũ oonanisye ndaĩa ata kwa syĩndũ sya kĩmwĩĩ kuma kwa Ĩthe wake? (Mt. 15:37; Yoa. 6:12; Ako. 3:15)
- Soma Yoana 6:1-21.
Ũmũnthĩ Aklĩsto matonya ata kũatĩĩa ngelekany’o ya Yesũ ĩũlũ wa maũndũ makonetye silikalĩ? (Yoa. 6:15; Mt. 22:21; Alo. 12:2; 13:1-4)
