KʼAʼUT naq keʼxkamsi laj Juan li kisubʼuk re li Jesus saʼ haʼ? Li xHerodias, li rixaqil li awabʼej, xikʼ naril laj Juan, joʼkan naq kixbʼaanu naq laj Herodes, li awabʼej tixtaqla xchʼotbʼal li xjolom laj Juan. Nimla maak keʼxbʼaanu re laj Juan!

Kʼajoʼ naq kirahoʼk saʼ xchʼool li Jesus naq kirabʼi aʼin, joʼkan naq xko xjunes saʼ jun li naʼaj. Li tenamit kitaqenk re ut naq li Jesus kiril aʼin, kixtoqʼobʼa ruhebʼ. Joʼkan naq kiʼok chi aatinak chirix li xNimajwal Awabʼejilal li Yos ut kiʼok chi xkʼirtasinkilebʼ.

Ak yook chi ok li qʼoqyink, naq ebʼ li xtzolom keʼxye re: ‹Ak xʼewuuk ut maakʼaʼ wank saʼ li naʼaj aʼin. Taqlahebʼ li qas qiitzʼin re naq teʼxloqʼ chaq xtzakahemq saʼ junaq rehebʼ li kʼalebʼaal›.

Li Jesus kixye: ‹Moko aajel ta naq teʼxik. Laaʼex texkʼehoq rehebʼ chi waʼak›. Li Jesus kixye re laj Felipe: ‹Bʼar tqaloqʼ xtzakahemq li qas qiitzʼin?›

Laj Felipe kixye re li Jesus: ‹Naabʼal tumin naʼajmank re naq teʼruuq chi waʼak chixjunilebʼ›. Tojaʼ naq kixye laj Andres: ‹Rikʼin li chʼinaʼal aʼin, wank oobʼ li kaxlan wa ut wiibʼ li kar. Abʼan moko ttzʼaqloq ta choʼq re li tenamit›.

Li Jesus kixye rehebʼ li xtzolom: ‹Yeehomaq re li tenamit naq teʼhilanq saʼ pachʼayaʼ›. Chirix chik aʼan, li Jesus kitijok chirix li tzakahemq, tojaʼ naq kixjachi. Ebʼ li xtzolom li Jesus keʼok xjekʼinkil li kaxlan wa ut ebʼ li kar saʼ xyanqebʼ li 5.000 chi winq, wank ajwiʼ naabʼal chi ixq ut kokʼal. Chixjunilebʼ keʼwaʼak toj reetal keʼnujak. Ut toj kixokmank 12 chakach li tzakahemq.

Li Jesus kixtaqlahebʼ li xtzolom saʼ jun li jukubʼ re naq teʼxik saʼ junpakʼal li nimaʼ Galilea. Saʼ li qʼoqyink naq yookebʼ chi xik chiru haʼ, kichalk jun li nimla kaqsut-iqʼ ut kiʼok chi reekʼasinkil chi kaw li jukubʼ. Ebʼ li xtzolom li Jesus keʼxuwak naq keʼril aʼin. Chirix chik aʼan, keʼril saʼ xchamal li qʼoqyink naq jun li winq yook chaq chi bʼeek saʼ xbʼeen li nimaʼ. Joʼkan naq keʼxuwak ut keʼok xjapbʼal re, xbʼaan naq inkʼaʼ nekeʼxnaw kʼaru aʼan.

Li Jesus kixye rehebʼ: ‹Mexxuwak, laaʼin!› Abʼan inkʼaʼ keʼxpaabʼ re li Jesus. Joʼkan naq laj Pedro kixye re: ‹Wi laaʼat, Qaawaʼ, bʼoqin re naq tinxik aawikʼin›. Li Jesus kixye re laj Pedro: ‹Kim chintawbʼal bʼiʼ!› Tojaʼ naq laj Pedro kiʼelk saʼ li jukubʼ ut kiʼok chi bʼeek saʼ xbʼeen li nimaʼ, abʼan kichalk xxiw ut kiʼok chi xik rubʼel haʼ. Li Jesus kikolok re.

Saʼ jun chik kutan, li Jesus kixchʼoolani ajwiʼ naabʼal li tenamit. Kixbʼaanu rikʼin wuqubʼ chi kaxlan wa ut moko naabʼal ta li kar. Ut chixjunilebʼ keʼwaʼak. Chaabʼil kixbʼaanu li Jesus. Naq li Jesus yooq chi awabʼejink saʼ Ruuchichʼochʼ maakʼaʼaq chik li rahilal.