KWAMWEKELE kintu kyatama bingi. Yoano Mubatishi po po bamwipailetu. Muka mfumu, aye Helodyasa kechi wamutemenwe ne. Ye walengejile ne mfumu kukambizha’mba Yoano bamuchibe mutwe.

Yesu byo aumvwine kino, waubile bingi bulanda. Wayile mungye kwa bunke bwanji. Bino bantu bamulondejile. Yesu byo amwene mabumba a bantu, wibobile lusa. Onkao mambo, wibafunjishishe pa mambo a bufumu bwa Lesa kabiji ne kubuka bantu babo bakolelwe.

Bonkabwa bufuku, baana banji ba bwanga baishile ko aji ne kwamba’mba: ‘Bwaila kala kabiji muno mo tuji, mungyetu. Bambilai bantu baye na kwipotela bya kuja mu mizhi iji kwipi.’

Yesu wibakumbwile’mba: ‘Kechi bafwainwa kuya ne. Mwibape bya kuja yenka anweba.’ Waalulukijile kwi Filipa ne kumwipuzha’mba: ‘Kwepi ko twakonsha kupota kajo ka kujisha bano bantu bonse?’

Filipa wakumbwile’mba: ‘Pasakutaiwa mali avula bingi pa kuba’mba tupote kajo kavula ka kwabanya muntu yense.’ Andeleo waambile’mba: ‘Uno nsongwalume wasenda kajo ketu, uji na bashinkwa batanu ne masabi abiji. Pano bino, kechi kavula kakukonsha kukumbanya bantu bonse ne.’

Yesu waambile’mba: ‘Ambilai bantu bekale pa nsono.’ Ponkapo, wasanchile kwi Lesa pa kwibapa kajo kabiji watatwile kwikatebaula mu bibese. Kepo baana ba bwanga batendekele kupana bashinkwa ne masabi ku bantu bonse. Kwajinga banabalume 5,000 kabiji ne banabakazhi bavula bingi kubikapotu ne baana. Bonse bajiile ne kwikuta kya kine kine. Kabiji baana ba bwanga byo batolawile bibese byashajilepo, bayuzhizhe bilukwa 12!

Yesu waambijile baana banji ba bwanga amba bapatame mu bwato ne kuya bushiya bwa Kalunga ka Ngalilea. Bufuku kwaishile lubesha mukatampe kabiji manyaki ashinjikilenga bwato konse konse. Baana ba bwanga baakaminwe bingi. Pakachi ka bilo, bamwene muntu saka enda pa mema kwiya ko bajinga. Batamine na moyo mambo kechi bamuyukile muntu ye bamwenenga ne.

Yesu waambile’mba: ‘Amiwa bano, lekai kuba moyo!’ Nangwa byonkabyo bazhinaukile’mba kechi ye iye ne. Kepo Petelo aambile’mba: ‘Nkambo, kana ye anweba, ñambilai ñende pa mema ngiye koko ko muji.’ Yesu wakumbwile’mba: ‘Iyanga!’ Ponkapo, Petelo wafumine mu bwato, keende ne pa mema! Pano waumvwine moyo ne kutendeka kwibila, bino Yesu wamupulwishe.

Pa kupitapo kimye, Yesu wajishishe jibiji bantu bavula bingi. Pa kino kimye, wibajishishe kwingijisha bashinkwa batanu na babiji ne tumasabi tucheche. Kabiji byonka byo kyajinga patanshi, kajo kajingatu mbwee. Nanchi kechi kintu kyawama kumona Yesu byo akwashishenga bantu nenyi? Byo akalamanga ke mfumu wa Lesa, kechi tukekalapo na kijikila kya kintu nangwa kimo ne!