DIAMBU diankenda dibwidi ovava. O Yoane wa mvubi ovondelo. Erodia wa nkaz’a ntinu kanzolanga ko. Wafilakesa ntinu mu zenga ntu a Yoane.

Vava Yesu kawa e diambu diadi, okendalele kikilu. Wele va fulu kia yandi kaka. Kansi, nkangu unlende. Vava Yesu kamona o nkangu, ubafwidi e nkenda. Ubalongele oma ma kintinu kia Nzambi yo wuka mbevo zau.

Oku masika, alongoki bezidi kwa yandi, oku vo: “Ovava vekanga, e ntangwa isakidi; sindik’e ndonga benda muna mpata-vata benda sumba madia.”

O Yesu ubavovese vo: “Ke ven’edi bendela ko; nubavana dia.” Oyuvwidi Filipo vo: “Akweyi tusumbila mbolo badi’awaya?”

O Filipo umvutwidi vo: ‘Nzimbu zayingi zivava muna sumba ulolo wa madia mefwana awonso. Andere ovovele vo: ‘Nleke ndioyo onatanga madia meto, una ye mbolo tanu, ye mbizi zole za maza: se nki kiokio vana vena ndonga yayi?’

O Yesu ovovele vo: ‘Nufongesa wantu vana titi.’ I bosi, otondele Nzambi mu madia. Obukunwini mbolo ye mbizi, ovene zo kw’alongoki. Alongoki bakayanese zo kwa wantu awonso. Awana badidi, tezo kia mazunda matanu m’akala ye ulolo w’akento yo wana. Awonso badidi, bayukwiti. Bakutikidi e nsadisw’a nkesona, mbangu kumi ye zole zazala.

O Yesu ovovese alongoki andi babonga nzaza benda kun’esimu dia mbu a Ngalili. Muna fuku wauna tembwa kiangolo kibalwakidi, o mavuku manengomwene nzaza yakuku yakuna. Alongoki bamwene kikilu o wonga. Muna ngingil’a fuku bamwene muntu odiatilanga vana ntandu a maza. Bakazìdi kuna wonga kadi ke bazaya ko nani ndioyo.

Yesu ubavovese vo: ‘Ke numoni wonga ko, i mono yuyu.’ Ke bankwikidi ko. O Petelo ovovele vo: “E Mfumu, ovo i ngeye yoyo, ungika ngiza kwa ngeye vana maza.” O Yesu vo: “Wiza.” O Petelo ovaikidi muna nzaza, odiete vana maza, kenda kwa Yesu. I bosi wonga umbakidi; oyantikidi odimuka, kansi o Yesu umvulwizi.

Oku kwalanda o Yesu wadikila mpe mazunda ma wantu. E nkumbu wau mu mbolo nsambwadi ye finzonzi kabadikila. Awonso mpe badia yo yukuta. Nga kediasivi ko e mpila in’o Yesu kalunga-lunganga o wantu? Vava keyala nze ntinu a Nzambi ke tutokanena nkutu ma ko.