MPANJI 93

Yesu Nadyishi Antu Amavulu

CHUMA chimu chakala chinamwekani. Yowanu Mpapatishu anamujahi tuhu katataka. Herodiya, iñoda mwanta, wamuheleli Yowanu. Dichi watwesheli kumwilisha mwanta kulonda amuketuli Yowanu mutu.

Yesu chanachitiyiyi hakuneña nankashi. Hakuya kwiluña dadilehi kakankawindi. Ilaña antu hiyakumulondela. Yesu chanamoniyi izaza, hakuyitiyila wushona. Dichi hakuyileja hawanta waNzambi, nikuyukila ayeji.

Namelelana atumbanji twindi hiyakwinza kudi yena nakumwila nawu: ‘Kwela dehi melela, nawa amunu mwisaña. Yileji antu ayi akalandi yakudya yawu kunyikala yidi kwakwihi.’

Yesu hakwakula nindi, ‘Hiyatela kuyaku. Yinkenu yakudya enu aweni.’ Hakubalumukila kudi Fwilipu nakumwihula nindi: ‘Tukulanda kudihi yakudya yatela kudyisha awantu ejima?’

Fwilipu hakwakula nindi, ‘Chikufwa mali amavulu nankashi hakulanda yakudya hakwila wejima wawu adyiku kanti.’ Anderi hakuhosha nindi: ‘Iwu kansi weyala wunatusendeli yakudya yetu, wukweti hohu mankendi atanu niinshi yiyedi. Ilaña hiyikushikila awantu ejimaku.’

Yesu hakuhosha nindi, ‘Yilejenu antu ashakami hamatahu.’ Dichi hakumusakilila Nzambi hayakudya, atachika nikuketola mankendi muyikunku. Chalondelelihu atumbanji hiyakwinka antu ejima mankendi niinshi. Hadi amayala 5,000 nimakombakaji amavulu awambanda nianyana. Wejima wawu hiyakudya nakwikuta. Cheliliwu atumbanji akuñwiji yakudya yashelihu, hiyakwinzesha yimpaya 12!

Yesu hakuleja apostolu indi kukandama muwatu kulonda azambuki mwishinadi Dejiya daÑaliliya. Mumpinji yawufuku mpepela yeneni hiyikwinza, mankanda hiyakuletesha watu kubenkañila. Atumbanji hiyakuchina nankashi. Kulondelahu, mukachi kawufuku hiyakumona muntu nakwenda hewulu damenji nakwinza kwadiñawu. Hiyakukaluka nawoma muloña hiyaneluki chuma chanakumoñawuku.

Yesu hakuyila nindi, ‘Bayi muchinaku. Iyami!’ Hela chochu hiyanachitejiku. Dichi Petulu hakumwila nindi: ‘Chalala neyi yeyi Mwanta, nleji nendi hewulu damenji ninzi kuwudeyi.’ Yesu hakumwila nindi: ‘Twaya!’ Petulu hakufuma muwatu nakwenda hewulu damenji! Nkumininaku hakuchina hakutachika nikunekama, ilaña Yesu hakumupulwisha.

Chimwahitili mafuku, Yesu hakudyisha cheñi makombakaji awantu. Iyi mpinji hakuyidyisha namankendi atanu nayedi niinshi janyanya jantesha. Kudi cheñi yakudya yayivulu yawejima wawu. Komana hichidi chiwahiku kushinshika hanhembelu oyu Yesu yahembelelimu antuku? Neyi hakuyula neyi mwanta waNzambi hitwakakamena chuma chidi chejimaku!

Matewu 14:1-32; 15:29-38; Yowanu 6:1-21.