¡MA TZAJ jun il! Ma kubʼ bʼiyoʼn Juan el Bautizante. Tuʼnjo nimtoq tqʼoj Herodías, aju t-xuʼjil ajkawil, tiʼj Juan. Xi tqʼamaʼn Herodías te ajkawil tuʼn tel qʼiʼn twiʼ Juan.

Tej tok tbʼiʼn Jesús jlu, tzaj tbʼis tuʼn. Xiʼ tjunalx tuj jun tembʼil jatumel mitiʼ kynajbʼil xjal toj. Atzun kye xjal ex lepeʼ tiʼj. Tej kyok tkeʼyin Jesús qe xjal, tzaj qʼaqʼen tkʼuʼj kyiʼj. Tuʼntzunju, ok ten yolel tiʼj tkawbʼil Dios kyukʼe, ex e kubʼ tqʼanen qe yabʼ.

Tej chʼixtoq tex qʼij, e pon laqʼeʼ qe t-xnaqʼtzbʼen Jesús ttxlaj ex xi kymaʼn te: ‹Aju tembʼil lu mintiʼ kynajbʼil xjal tuj, ex ma qo qax. Qʼmanxa kye xjal tuʼn kyxiʼ kyuj kojbʼil nqayin tuʼn tlaqʼet chʼin kywa›.

‹Nya iltiʼj tuʼn kyxiʼ xjal laqʼol kywa›, chi Jesús. ‹Kyqʼonxe chʼin kywa›. Xitzen tqanin Jesús te Felipe: ‹¿Jatumel jaku qoʼx loqʼel kywa kykyaqilju xjal lu?›

‹Nimx te pwaq kxel tiʼn tuʼn ttzaj laqʼet wabʼj kye kykyaqil xjal ex naqx chʼin te junjo kxel qʼet›, chi Felipe xi ttzaqʼweʼn. Jawtzun yolin Andrés ex xi tqʼamaʼn: ‹Aju qʼa lu iqʼen jweʼ pan ex kabʼe kiẍ tuʼn. Melayxlo kanin tuʼn kykʼaʼchit kykyaqil xjal lu›.

‹Kyqʼamanxe kye kykyaqil xjal tuʼn kykubʼ qʼuqeʼ tibʼaj kʼul›, chi Jesús. Xitzen tqʼoʼn Jesús chjonte te Dios tiʼj wabʼj, ex e kubʼ tpiẍen. Xitzun kyqʼoʼn t-xnaqʼtzbʼen pan ex kyiẍ kye kykyaqil xjal. Attoq 5.000 xinaq, ex nim xuʼj kyukʼex kʼwaʼl. Kykyaqil qe jlu e waʼn. Atzun tej tjaw kyiʼn t-xnaqʼtzbʼen Jesús ajo kyaj, ¡e noj 12 chiʼl kyuʼn!

Xi tsamaʼn Jesús qe t-xnaqʼtzbʼen tuʼn kyxiʼ toj jun tal bark tuʼntzun kyikʼx tuj mar te Galilea. Tzaj nimxix kyqʼiqʼ tuj qonikʼen aju, ex jaw xtuleqʼin aʼ aju nxiteq tiʼn bark tuj jun plaj ix nxitaq tiʼn toj juntl plaj. Tzaj nim kyxobʼil qejo t-xnaqʼtzbʼen Jesús. Tojtzun tmij aqʼbʼel kyil, mo kylom, jun xjal in bʼettaq tibʼaj aʼ tuʼn tpon kyukʼil. E jaw ẍchʼin tuʼnju mitiʼteq ojtzqiʼn kyuʼn alkyetoq in bʼet tibʼaj aʼ.

‹¡Miʼn che xobʼe, aqin weye!› Chi Jesús kye. Mitiʼ xi kyokslaʼn (kynimin) jlu. Kyjuʼtzun xi tqʼamaʼn Pedro kyjalu: ‹Tat, qa aya, qʼmantza tuʼn nxiʼye tukʼila tibʼaj aʼ›. Xitzun tmaʼn Jesús te: ‹¡Ku ttzaja!› ¡Kuʼtztzun Pedro tuj bark, xi bʼet tibʼaj aʼ tuʼn tpon tukʼe Jesús! Tzajtzen t-xobʼil Pedro ex kuʼx mulqʼaj tuj aʼ, atzunte Jesús klet Pedro tuʼn.

Yajxetl, e waʼn juntl maj nimxix xjal tuʼn Jesús. Bʼent jlu tuʼn Jesús tukʼe wuq pan ex junjun kiẍ. Ax ikx kanin wabʼj kye kykyaqil xjal. ¡Tbʼanelxix aju bʼent tuʼn Jesús! ¡Mlay tzaj bʼajtl qkʼuʼj tiʼj tiʼchaqku at tajbʼen qe tjaqʼ tkawbʼil!