SA̱KÁN ku̱u iin tu̱ndóʼo káʼnu. Xa̱ʼnína ta̱ Juan ta̱ Sákuchi na̱ yiví. Ñá Herodías ñá síʼí ta̱ rey sáa̱ní-iniñá xíniñá ta̱ Juan. Ñáyóʼo sa̱xinu̱ñá ini ta̱ rey ña̱ ná kaʼndana su̱kún ta̱ Juan.

Tá na̱kunda̱a̱-ini ta̱ Jesús xa̱ʼa ña̱yóʼo ni̱kusuchíní-inira. Ki̱ta iinlá miíra ku̱a̱ʼa̱nra chí nu̱ú kǒo ni iinna ndóo. Soo ku̱a̱ʼákaví na̱ yiví ndíku̱nna ku̱a̱ʼa̱nna sa̱tára. Tá xi̱ni ta̱ Jesús na̱yóʼo, ni̱kundáʼvi-inira xi̱nirana. Ki̱xaʼára nátúʼunra xíʼinna xa̱ʼa ña̱ kaʼndachíñu Ndióxi̱ ta sa̱ndáʼatura ndiʼi na̱ kúúmií kue̱ʼe̱.

Tá xa̱ku̱a̱ʼa̱n kúaa ki̱xi na̱ discípulo ta ni̱ka̱ʼa̱nna xíʼinra: ʼXa̱ku̱a̱ʼa̱n kúaava ta yóʼo kǒo ña̱ʼa kuxuna, ka̱ʼa̱n xíʼinna ná nu̱ʼu̱na ña̱kán va̱ʼa ku̱ʼu̱nna satána á kueena ña̱ʼa kuxuna chí ñuu válí káaʼ.

ʼKǒo xíniñúʼu ku̱ʼu̱nna, taxindó ña̱ kuxunaʼ, káchi ta̱ Jesús xíʼinna. Ta̱ Jesús xi̱tora nu̱ú ta̱ Felipe ta ni̱ka̱ʼa̱nra xíʼinra: ʼFelipe, ¿ndáa míí ku̱ʼu̱nyó kiʼinyó ña̱ʼa kuxu ndiʼi na̱ yiví yóʼo?ʼ

ʼKu̱a̱ʼání xu̱ʼún kuniñúʼuyó ña̱ kiʼinyó ña̱ʼa kuxu ndiʼi na̱yóʼo ta ni saáví kǒo kitañaʼ, káchi ta̱ Felipe. Nda̱kuiin ta̱ Andrés káchira: ʼTa̱ loʼo yóʼo ta̱ ndíso ña̱ʼa kuxuyó kǒo ña̱ʼa ku̱a̱ʼáví ndísora, u̱ʼu̱n kuití si̱táva̱ʼa xíʼin u̱vi̱ ti̱a̱ká ndísora. Kǒo kita miívíña ná taxiyóña ndaʼa̱ na̱ yiví yóʼoʼ.

ʼKa̱ʼa̱nndó xíʼin na̱ yiví ná kundoona nu̱ú ku̱ʼu̱ʼ, káchi ta̱ Jesús. Tasaá ni̱ka̱ʼa̱nra xíʼin Ndióxi̱ xa̱ʼa ña̱ kuxuna ta ki̱xaʼára ndátaʼvíra ñaʼñu tá ñaʼñuña. Na̱ discípulora ki̱xaʼána táxina si̱táva̱ʼa xíʼin ti̱a̱ká ndaʼa̱ ndiʼi na̱ yiví. Ki̱ʼva 5,000 ta̱a kúúna, ta ndóo ku̱a̱ʼáka ná si̱ʼí xíʼin na̱ va̱lí. Ndiʼina xi̱xina nda̱a̱ nda̱ʼa-inina. Tá nda̱kaya na̱ discípulo ta̱ Jesús ña̱ ni̱ndo̱o ki̱ʼva 12 canasta náʼnu kúúña.

Ta vitin ta̱ Jesús sa̱ndáara na̱ discípulo satá barco ña̱ ko̱sokavana tá mar Galilea. Ta ñu̱ú ni̱xi̱kakaví ta̱chí kini iin kániña nu̱ú mar ta tú barco iin ku̱a̱ʼa̱n va̱xinú nu̱ú ti̱kui̱í. Ni̱yi̱ʼvíkaví na̱ discípulora. Tá sava ñu̱ú xi̱nina iinna xíka nu̱ú ti̱kui̱í ta va̱xina nu̱ú ñúʼuna. Na̱ discípulo yóʼo ni̱yi̱ʼvíkavína chi kǒo xíni̱na ndáa ña̱ʼa kúúña.

ʼKǒo yi̱ʼvíndó, yi̱ʼi̱va kúúraʼ, káchi ta̱ Jesús xíʼinna. Ni va̱ása kándíxa-ininaña. Tasaá ni̱ka̱ʼa̱n ta̱ Pedro xíʼinra: ʼTá ndixa yóʼó kúúra Táta ka̱ʼa̱n xíʼi̱n ná xa̱i̱ kakai̱ nu̱ú ti̱kui̱í xíʼúnʼ. Saá ni̱ka̱ʼa̱n ta̱ Jesús xíʼinra: ʼXaúnʼ. Ta ki̱tara xíkara ku̱a̱ʼa̱nra nu̱ú ti̱kui̱í, tasaá ni̱yi̱ʼvíra ta ki̱xaʼá sáʼvira inirá, soo ta̱ Jesús sa̱kákurara.

Ni̱ya̱ʼa loʼo tiempo tuku sa̱kuxu ta̱ Jesús ku̱a̱ʼání na̱ yiví. Soo vitin u̱xa̱ si̱táva̱ʼa xi̱niñúʼura xíʼin loʼo ti̱a̱ká. Ta tuku ki̱taña xi̱xi ndiʼina. Va̱ʼaní xi̱ndaa ta̱ Jesús ndiʼi na̱ yiví. Tá ná kaʼndachíñura ni iin ña̱ʼa kǒo kundi̱ʼi̱ka-iniyó xa̱ʼa.