KUA lingika vimo via ku pihia cikuma. Uze Yoano mukua ku mbatiza va na mu tsihi. Muomu mpuevo ya muangana Helonde ua zindile Yoano. Ngeci ua lingisile muangana linga a tume vantu va ka mu tape mutue.

Kaha omo Yesu ua vuile ndzimbu yaco, ua vuile vusiua vua kama. Ngeci ua ile kua lika lieni. Vunoni vantu va mu kavangayele. Omo Yesu ua muene vivunga, ua va vuilile cikeketima. Kaha ua putukile ku va longesa via vuangana vua Njambi na ku saka mavezi avo.

Kaha ku cinguezi vandongesi veni vezile kuli ikeye nguavo: ‘Litangua lia toko kaha kuno ku mpambo ya ngoco. Sanduola vantu linga va ka lande via-ku-lia mu membo a ha hiehi’.

Vunoni Yesu ngueni: ‘Ka ci tava va ye ngoco. Va hanenu yenu via-ku-lia’. Kaha ua tala kuli Filipu na ku mu hula ngueni: ‘Kulihi tu hasa ku landa via-ku-lia vi hasa ku uania mbunga?’

Kaha Filipu ngueni: ‘Linga vose va puisemo tu ka sanduola zimbongo zia zingi cikuma-kuma. Vunoni Anduleo ua handekele ngueni: ‘Ou mukuendze, na ambata via-ku-lia vietu, a li na vimbolo vitanu na vantsi vavali. Vunoni ka va uania muomu mbunga ya ingi cikuma’.

Kaha Yesu ngueni: ‘Lekenu vantu va tumame ha muila’. Ngeci ua santselele Njambi omo lia via-ku-lia kaha ua putuka ku pazuola vimbolo mu vivalavala. Kaha vandongesi va putukile ku tepela ku vantu vimbolo na vantsi. Ha kele vamala va ku pua 5.000, na makulukazi a vampuevo na vanike. Vose va lile va kutile. Kaha omo vandongesi va kunguluile visupo, va sulisile vihele via ku pua 12!

Kaha Yesu ua lekele vandongesi veni linga va kovele mu vuato na ku zavuka cisali ca ku Ngalileya. Ku vutsiki vuze kua nokele liniondzi kaha mancimba a lingisile vuato ku ndenga-ndenga. Ngeci vandongesi va vuile vuoma vua kama cikuma. Kaha mu kati ka vutsiki va muene muntu a li na kuiza kuli vakevo helu lia mema. Va litetelele omo lia vuoma, muomu ka va tantekeyele iya ua kele na ku iza.

Kaha Yesu ngueni: ‘Yange! Kati mu ivue vuoma’. Kasi ka va tavele. Ngeci Petulu ua handekele ngueni: ‘Muangana, nga yove mpundu, nji leke linga nji ku sese helu lia mema’. Kaha Yesu ngueni: ‘Tuaya!’ Kaha Petulu ua fumine mu vuato uendele helu lia mema! Vunoni Petulu ua vuile vuoma ngeci ua putukile ku zivilila mu mema kaha Yesu ua mu ovuele.

Yesu ua lisile naua makulukazi a vantu vakuavo. Ua va lisile na vimbolo vitanu na vivali na tuvantsi tua tundende. Vunoni vose va puisilemo, ngue vaze va katete. Ku tantekeya vati Yesu ua muesele ngozi ku vantu ca pua ca cili cikuma, ni vati? Yesu mua ka sika mu vuangana vua Njambi ka tu ka lisosomua na vimo viahi!