Tanojnots 93

Jesús kintamakak miakej taltikpakneminij

TEL amo kuali tein mochiuak. Juan Taauijkej kimiktijkej. Herodías, inamik tekiuaj, kitauelitaya. Uan uelik kichiualtij tekiuaj maj tanauatiani maj kikechkotonanij.

Keman Jesús kikakik nejin, motayokoltij. Yejika yajki iselti kampa taseltijkan. Sayoj ika taltikpakneminij kitojtokakej. Keman Jesús kinitak miakej taltikpakneminij, kiniknelij. Yejika kininojnotsak ika itekiuajyo Dios uan kinpajtij kokoyanij.

Keman tapoyauik, imomachtijkauan Jesús motokijkej kampa yetoya uan kiiluijkej: ‘Nikan taseltijkan uan tayouatia. Yejika xikinilui taltikpakneminij maj yakan itech altepekonemej uan maj kikouatij toni kikuaskej’.

Jesús kiniluij: ‘Amo onkak keyej yaskej. Ta namejuan xikintamakakan’. Ompa, Jesús kitajtanij Felipe: ‘¿Kani uelis tikouaskej takual maj kinajsi nochin taltikpakneminij?’

Felipe tanankilij: ‘Maski tepitsin takual tikinimakaskej nochin, moneki miak tomin tein ika tikouaskej’. Andrés kijtoj: ‘Nejin telpoch kipia makuil koyotaxkalmej uan ome amichimej. Nejin amo kinajsis nochin taltikpakneminij’.

Jesús kijtoj: ‘Xikiniluikan maj motalikan sakaixko’. Ompa, Jesús kitasojkamatilij Dios takual uan kikojkotonak. Imomachtijkauan kinixejxelouilijkej takual nochin taltikpakneminij. Moajsiaj 5,000 takamej, uan tel miakej siuamej uan konemej. Nochin takuajkej uan ixuikej. ¡Uan keman imomachtijkauan kiololojkej tein mokauak, kipexontijkej 12 chikiujmej!

Jesús kiniluij imomachtijkauan maj kipanauianij ueyiat Galilea ika se barco. Nejon youak tetsaujkaejekak, uan at kiuiuikaya barco. Uan imomachtijkauan motelmoujtijkej. Ompa, kemej tajkoyoual kiitakej aksa nejnemia aixko uan yaya kinajsiti. Mojkatsajtsikej porin amo kimatiaj toni kiitstoyaj.

Jesús kiniluij: ‘Amo ximomoujtikan. ¡Nejua ni Jesús!’ Ayamo uelia kineltokayaj. Yejika Pedro kijtoj: ‘Komo tejua ti toTekotsin, xinechilui maj ninejnemi aixko uan maj nimitsajsiti’. Jesús kinankilij: ‘¡Xiuiki!’ ¡Pedro kisak uan peuak nejnemi aixko! Keman kichiuak, kimouilij at uan peuak pankalaki, sayoj ika Jesús kipaleuij.

Satepan, Jesús oksepa kintamakak tel miakej taltikpakneminij. Uan ijkuak, kichiuak ika chikome koyotaxkalmej uan se ome eyi amichimej. Uan oksepa nochin ixuikej. ¡Semi kuali tikitaskej keniuj kiitaya Jesús tein kinpolouaya taltikpakneminij! ¡Keman yej tekiuajtis, amo teyi ika timotekipachoskej!

Mateo 14:1-32; 15:29-38; Juan 6:1-21.