TLAPOUALISTLI 93

Jesús miakej okintlamakak

ITLAJ tlen temomojti opanok. Yikin okimiktijkej Juan akin Teapolaktia. Herodías, isiua ueyi tekiua, okikokoliaya. Uan okichi ueyi tekiua ma tlanauati ma kitekilikan itsonteko Juan.

Ijkuak Jesús okikak nochi nin, omoyolkoko. Oyajki san ye iselti kanin amo akaj okatka. Maski ijkon, tlaltikpaktlakamej noijki ompa oyajkej. Ijkuak Jesús okinmitak tlaltikpaktlakamej, okinmiknomatki. Ik non, okintlapoui itech iTekiuajkayo toTajtsin Dios, uan okinpajti akinmej omokokoayaj.

Itech non tonal ijkuak yiyoak, imachtijkauan oyajkej inauak uan okiluijkej: ‘Yiteotlak, uan nikan amo itlaj onka. Xikinmilui ma yakan itech altepemej tlen amo uejka katej uan ma kimokouilikan tlen kikuaskej’.

Jesús okijto: ‘Yejuan amo moneki yaskej. Namejuan xikintlamakakan’. Jesús okitak Felipe uan okitlajtlani: ‘¿Kanin uelis tikoaskej miak tlakuali pampa nochtin ninmej tlaltikpaktlakamej?’.

Felipe otlanankili: ‘Sapanoa patio kisas tikoaskej miak tlakuali pampa tikinmakaskej ajachitsin’. Ijkuakon, Andrés otlajto uan okijto: ‘Nin telpochtli kipia makuili panes uan ome michimej. Amo kajxilis pampa nochtin tlakuaskej’.

Jesús okinmilui: ‘Xikinmiluikan ma motlalikan ipan xiuitl’. Ijkuakon, Jesús okitlasojkamatili toTajtsin Dios pampa okinmakak tlakuali, uan opejki kikojkotona. Imachtijkauan opejkej kixejxeloa pan uan michin. Okatkaj 5,000 tlakamej, uan sapanoa miakej siuamej uan konemej. Nochtin kuali otlakuajkej uan oixuikej. Uan ijkuak imachtijkauan Jesús okikololojkej tlakuali tlen omoka, okikololojkej 12 chikiuitl tlen otentokaj.

Jesús axkan okinmilui imachtijkauan, ma kalakikan ijtik se akali pampa panoskiaj itech ueyi atl Galilea. Ipan non yoak omochi se ueyi ejekakiauitl, uan atl okoliniaya akali. Imachtijkauan omomojtijkej miak. Ijkuakon, itech yoak okitakej akaj tlen onejnemiaya ipan atl ixpan yejuan. Chikauak otsajtsikej pampa amo okimatiayaj tlen okitayaj.

Jesús okinmilui: ‘Amo ximomojtikan. ¡Ne niJesús!’. Amo ueli okineltokayaj. Ik non, Pedro okijto: ‘Tla te, noTeko, xinechilui ma ninejnemi ipan atl pampa nias kanin te tika’. Jesús okinankili: ‘¡Xiuiki!’. ¡Uan Pedro okiski uan opejki nejnemi ipan atl! Ijkuakon, Pedro omomojti uan opejki apolaki, maski ijkon, Jesús okimakixti.

Satepan, Jesús oksepa okintlakualti miakej tlaltikpaktlakamej. Ijkuakon, san okipiaya chikome panes uan san sekimej michimej. Uan oksepa, nochtin kuali otlakuajkej uan oixuikej. ¡Melauak kuali tikitaj ken Jesús okinpaleui tlaltikpaktlakamej! ¡Ijkuak Jesús peuas tlanauatis, ayakmo itlaj techtekipachos!

Mateo 14:1-32; 15:29-38; Juan 6:1-21.