PAPITA otyipuka tyimue otyivi. João Batista walekua. Herodia omukai wo hamba ankho umuyele. Herodia wetyivila okuhindila ohamba itume okuteta João omutue.

Etyi Yesu etyiiva, anumana unene. Akakala pomphangu imue aike. Mahi ovanthu vemukuama. Etyi Yesu amona otyinyingi tyovanthu, wakala nokankhenda navo. Moluotyo, evepopila kombinga Youhamba wa Huku, nokuvelula ovavei vavo.

Kokangulohi, ovalongwa vae veya pu Yesu avati: ‘Lietaka, omphangu ei itupu natyike. Ovanthu ava vetuma vaye opo vakalande okulia kuavo, po mapundaumbo ekahi popepi.’

Yesu akumbulula okuti: ‘Ovo, kavesukile okuenda. Onue muna okuveavela okulia.’ Yesu apilukila ku Filipe apulu: ‘Opi tupondola okukalanda okulia kutuuka pala okuavela ovanthu ava aveho?’

Filipe akumbulula okuti: ‘Tutupu apa tukapola onombongo ononyingi pala okukalanda okulia kutuuka, opo kese umue alie katutu.’ Andre ati: ‘Omukuendye ou, wokutyinda okulia kuetu, una onombolo ononthano no nombisi onombali. Mahi kamakutuuka pala ovanthu ava aveho.’

Yesu apopi okuti: ‘Tolelei ovanthu vaumphame peholi.’ Yesu apandula ku Huku pala okulia, ahimbika okuvembaula onombolo. Iya ovalongwa avaavela ovanthu aveho ombolo nombisi. Ankho pena 5.000 ovalume, novakai novana. Aveho valia avekuta. Etyi ovalongwa vaongolola evi viahupapo, vayulisa onosestu 12.

Yesu pahe atumu ovalongwa valonde mowato na vayauke Elunga lio Galileia. Mokuenda kuounthiki, akuya epukupuku limue enene iya omeva aahimbika okuveta mowato. Ovalongwa avakala unene nouoma. Mokati kounthiki, vamona omunthu umue ukahi nokuenda kombanda yomeva. Avaulula nouoma, mokonda ankho kavetyii oityi vekahi nokumona.

Yesu ati: ‘Ame. Muhakalei nouoma.’ Ovalongwa, kavetavelele okuti o Yesu. Moluotyo Petulu wapopia okuti: ‘Inkha ove umue, yeka ndyiende kombanda yomeva, okuya nokuove.’ Yesu akumbulula okuti: ‘Endyu!’ Petulu atuluka mowato aende kombanda yomeva. Anthi, konyima wakala nouoma iya ahimbika okunyingila momeva, mahi Yesu emuyovola.

Konyima, Yesu aavela vali okulia ovanthu ovanyingi. Monthiki oyo, Yesu walinga ehuviso nonombolo epanduvali noumbisi uhehi. Mahi aveho valia avekuta. Onkhalelo omu Yesu ankho atekulila ovanthu haongwako? Moutumini wae ngo hamba Youhamba wa Huku, ovanthu kavakasukalala vali notyipuka natyike.