Ekitebyo 93

Yesu Okuriisa Abantu Baingi

EKINTU kibi munonga kyaheza kubaho. Yohaana Omubatiza yaaheza kwitwa. Herodia, muka omugabe, akaba atarikumukunda. Kandi akareetera omugabe kutemaho Yohaana omutwe.

Yesu ku yaahuriire ebi, yaaguubwa kubi munonga. Yaagyenda wenka yaaza omu mwanya ogucureire. Kwonka abantu baamukuratira. Yesu ku areeba omutwe gw’abantu, abagirira embabazi. N’ahabw’ekyo agamba nabo aha by’obukama bwa Ruhanga, kandi akiza abarwaire baabo.

Omu mwabazyo ogwo abeegi be baija ah’ari kandi bagira bati: ‘Bwaizire, kandi ogu mwanya gwehereire. Yohereza abantu bagyende beeshakire eby’okurya omu byaro bya haihi.’

Yesu agarukamu ati: ‘Tihariho kirikubatwara, mubahe eky’okurya.’ Yesu ahindukira Filipo, amubuuza ati: ‘Ni nkahi ei turikubaasa kugura eby’okurya ebirikumara aba bantu?’

Filipo amugarukamu ati: ‘Nikiija kutwara empiiha nyingi munonga okugura eby’okurya bingi kugira ngu buri omwe atungyeho ak’okurya. Anderea amugira ati: ‘Omwojo ogu, oyekoreire eby’okurya byaitu, aine emigaati etaano hamwe n’eby’enyanja bibiri. Kwonka ebi tibirikubaasa kumara nakakye abantu aba boona.’

Yesu agira ati: ‘Mushutamye abantu ahansi omu bunyaatsi.’ Bwanyima asiima Ruhanga ahabw’eby’okurya, kandi atandika kubega omugaati omu bucweka. Ekyakuratiireho, abeegi baheereza abantu boona emigaati n’eby’enyanja. Hariho abashaija 5,000, hamwe n’enkumi n’enkumi z’abakazi n’abaana baingi. Boona barya okuhitsya obu beigutsire. Bwanyima abeegi baatoratoora oburagarika, hatsigaraho ebitenga 12 byijwire!

Hati Yesu n’abeegi be baza omu bwato kwambuka Enyanja Galilaaya. Omu kiro habaho omuyaga mwingi, kandi ebingonzi by’enyanja bitooza obwato oku n’oku. Abeegi batiina munonga. Bwanyima omu itumbi nyekiro, bareeba omuntu naagyendera aha nyanja naabaizira. Bataka omu iraka rihango batiinire, ahabw’okuba tibarikumanya eki barikureeba.

Yesu abagira ati: ‘Mutatiina, niinye!’ Nabwe tibarikubaasa kukiikiriza. N’ahabw’ekyo Petero agira ati: ‘Buzimazima ku oraabe oriiwe, Mukama wangye, nyikiriza nyije nningyendera aha maizi nkushangye.’ Yesu amugarukamu ati: ‘Ija!’ Petero aruga omu bwato, agyendera aha maizi! Bwanyima atiina atyo atandika kutobera, kwonka Yesu amujuna.

Bwanyima kandi Yesu agaruka ariisa enkumi z’abantu. Aha murundi ogu abarisa aine emigaati mushanju n’eby’enyanja bikye. Kandi nabwo hariho eby’okurya ebirikumara abantu boona. Tikirungi munonga okureeba oku Yesu arikufayo aha bantu? Ku araatandike kutegyeka nk’omugabe titurigaruka kwerarikirira kintu kyona!

Matayo 14:1-32; 15:29-38; Yohaana 6:1-21.