LOWO geeshsha masisannori ikke kaino. Cuuaancho Yohaannisi shine kaˈnoonni. Heroodiyaada yinanniti nugusu galte iso dibaxxanno. Konni daafira nugusu Yohaannisi goowa muranno gede assiissu.

Yesuusi tenne macciishshiti, lowo geeshsha dadilli. Isi callisi mannu nookki bayichcho haˈri. Mannu kayinni hoodesi haˈri. Yesuusi lowo manna laiti, lowo geeshsha mararinsa. Konni daafira Maganu mangistere kulinsa; qoleno xiwamino manna hursi.

Hattee hawarro rosaanosi isiwa shiqqi yite togo yitusi: ‘Yanna hashshitino; qoleno kuni mannu nookki bayichchooti. Qooxeessaho noo qachchinni sagale hidhanno gede manna haˈrisi.’

Yesuusi togo yee qoli: ‘Haˈra dihasiissannonsa. Sagale kiˈne uyiyyensa.’ Yesuusi alba Filiphphoosiwa hige, ‘Konni baalunku mannira ikkitanno sagale hiikkiinni hirrokka?’ yee xaˈmisi.

Filiphphoosi togo yee qoli: ‘Konni baalu mannira shiima shiima sagale nafa iillishate lowo woxi hasiisanno.’ Indiriyaasi qole togo yii: ‘Konni beettira ontu timinna lame qulxuˈme noosi. Kayinni konni baalu mannira diˈˈikkanno.’

Yesuusino, ‘Manna hayissote ofollanno gede asse’ yii. Hakkiinnino sagalete Magano galate, tima hiiqqaqqi. Hakkunni gedensaanni, rosaanosi timanna qulxuˈme manna baalaho uyitu. Hakkiichcho 5,000 labballi no; qoleno lowo meentinna ooso no. Kuni manni baalunku duuwa geeshsha iti. Rosaanosi gattino sagale gamba assituta, 12 saffe woˈmitu!

Hakkunni gedensaanni, Yesuusi rosaanosi Galiilu Baara widoogge fultara howolo eˈanno gede kulinsa. Hashsha wolqaataame hombobalatte kaˈe, howolo kawanna kaˈa doyissa hanaffu. Rosaano lowo geeshsha waajjitino. Hakkiinnino hashshu taaloote, mitturichchi wayi aana haˈranni insawa hige daanna laˈu. Insano maatiro affinokki daafira, waajjite raartu.

Yesuusino, ‘Aneetina waajjitinoonte!’ yiinsa. Insa kayinni iso ikkinota diammantino. Konni daafira Pheexiroosi, ‘Addinta ati Mootichchahoro, waa kaxxanni atewa hige dayeemmo gede assie’ yiisi. Yesuusino, ‘Amoxa!’ yee qoli. Hakkiinnino Pheexiroosi dirre waa kaxxanni haˈri! Shiima geeshsha haˈri gedensaanni kayinni waajji; wayino itasira kai; Yesuusi kayinni gatisisi.

Yannate gedensaannino Yesuusi kumunni kiirranni manna itisino. Hakkawote kayinni lamalu timinninna shiima qulxuˈmenni itisino. Xaano baalunku manni duuwe itino. Yesuusi manna towaatanno gari dancha diˈˈikkino? Isi Maganu doorino nugusa ikke moohanno wote, ninke mittu coyirano horonta diyaandeemmo!