NIRÍGÁ mbá dí raʼkhí kayuʼ. Ndiʼkhún guámbu̱u̱n nixiyáa Juan bi̱ nakumíínʼ iyaʼ xa̱bu̱. Herodías, a̱ʼgiu̱u̱ rey, nikiʼnáa kaʼyoo mbanda̱ʼkho. Ga̱jma̱a̱ niʼngo̱o̱ niʼni rí rey manda̱ʼa̱ rí murturígú edxu̱u̱ Juan.

Índo̱ Jesús naʼdxun rígi̱, naxtáa gíná. Na̱jkha̱ náa mbaaʼ gíná náa ma̱ndoo maxtáa mbáwíi. Mú xa̱bu̱ nagún náa ejkha̱. Índo̱ Jesús ndaʼñún mbaʼin wéñuʼ xa̱bu̱, nagáwiinʼ a̱jkiu̱u̱n kaʼñún. Ikha jngó, naʼthúún ga̱jma̱a̱ numuu reino ndrígóo Dios, ga̱jma̱a̱ naʼni thanún xa̱bu̱ bi̱ naʼniún nandii.

Mbruʼun rúʼko̱ naguwáʼ discípulos náa Jesús ga̱jma̱a̱ nuthan: ‹Wakíʼ má, ga̱jma̱a̱ gi̱i̱ na̱nguá kúwi̱i̱n xa̱bu̱. Arathá ngaún mu ma̱ndoo mutsi ganitsu náa xuajin dí rígá mijngii›.

Jesús naʼthúún: ‹Ikhiin na̱nguá xú magúun. Ikháanʼ gúxnu̱u̱n ganitsu rí muphu̱›. Índo̱ Jesús natanga̱a̱ náa Felipe mu maraxu̱u̱: ‹Náa gándoo mutsixu mbaʼa ganitsu mu muphu̱ xúgínʼ xa̱bu̱ bugi rá.›

Felipe nariʼña: ‹Ra̱ʼkhá tháán mba̱a̱ mbújkha̱a̱ gáʼyóoʼ mu miʼtsi̱ wéñuʼ ganitsu muphu̱ xúgínʼ xa̱bu̱›. Andrés naʼthí: ‹Dxámá bugi̱ bi̱ na̱jkha̱ kayóo ganitsu ndrígulú, kagu witsu pan ga̱jma̱a̱ a̱jmi̱i̱n egi̱ʼ. Xáʼngo̱o̱ muphu̱ xúgínʼ xa̱bu̱ bugi̱›.

Jesús naʼthí: ‹Guthu̱u̱nla xa̱bu̱ mutrigi̱i̱n náa raxa›. Ikhú Jesús naxnáa núma̱aʼ Dios ga̱jma̱a̱ numuu ganitsu, ga̱jma̱a̱ nagíʼdu̱u̱ naxpigui pan ga̱jma̱a̱ egi̱ʼ. Discípulos nuxpiʼta̱a̱ ganitsu náa xúgínʼ xa̱bu̱. Kuwa mbá 5,000 xa̱bekha, ga̱jma̱a̱ ra̱ʼkhá tháán mbaʼin wéñuʼ gu̱ʼu̱ ga̱jma̱a̱ e̱ji̱n. Mbá xúgínʼ nuphiʼtsu asndu náa nagiʼmún. ¡Índo̱ discípulos ndrígóo Jesús nuraxi̱i̱ rí nipídunʼ, rígá mbá 12 ixtu̱ʼ rí kajtíí!

Rí xúgi̱ Jesús naʼni rí discípulos ndrígóo majngún náa mbá lancha mu makidin náa lamáa dí rígá naa Galilea. Ra̱ʼkhá tháán nixnúu ruʼwa mbiiʼ mbruʼun rúʼko̱, ga̱jma̱a̱ iyaʼ naʼni rí lancha maʼga̱ kúʼúun asndu náa. Ikhú discípulos namiñun wéñuʼ. Índo̱ naʼni tikhu nduʼun nandoo nduyáá mbáa xa̱bu̱ bi̱ xtáa ra̱jkha̱ kruámuʼ náa inuu iyaʼ ga̱jma̱a̱ na̱jkha̱ náa ikhiin. Nundxa̱ʼwa̱ numuu rí nimiñun, numuu rí tséyáá ndiéjunʼ ñajunʼ rí kuwa ruyáá.

Jesús naʼthí: ‹Xámiñalá, ¡ikhúúnʼ ñajunʼ!›. Mú na̱nguá enimbu̱ún xóó. Ikha jngó Pedro naʼthí: ‹Tátá, á mu rí ikháánʼ, arathúnʼ rí maʼgá kruámuʼ náa inuu iyaʼ mu maʼgá náa ikháánʼ›. Jesús nariʼña: ‹¡Ayi!›. ¡Pedro nagájnuu ga̱jma̱a̱ na̱jkha̱ náa inuu iyaʼ! Ikhú namiñu wéñuʼ ga̱jma̱a̱ nagíʼdu̱u̱ narmáʼáan náa awúu̱n iyaʼ, mu Jesús naʼnikríyaʼ.

Nda̱wa̱á, Jesús naxniʼtsun mbaʼin wéñuʼ xa̱bu̱ mbu̱júu̱. Rí xúgi̱ naxniʼtsun ga̱jma̱a̱ juwan pan ga̱jma̱a̱ nguathi̱i̱n egi̱ʼ. Ma̱ngaa narígá wéñuʼ ganitsu muphu̱ xúgínʼ mbu̱júu̱. Lá na̱nguá májánʼ wéñuʼ índo̱ nduʼyáá rí Jesús naxmiéjunʼ kaʼñúún xa̱bu̱ ráʼ. ¡Índo̱ gáʼtañájunlú ikhaa, nánguá maxmiéjunʼluʼ nditháan kayuʼ!