BUAT neʼebé aat tebes akontese. Ema foin oho João Batista. Herodias, liurai nia feen, la gosta João. Nia konsege halo liurai atu koʼa João nia ulun.

Bainhira Jesus rona kona-ba neʼe, nia triste tebes. Nia bá mesak iha rai-fuik ida. Maibé ema tuir nia. Kuandu nia haree ema-lubun boot, nia hanoin tebes sira. Nuneʼe, nia koʼalia ba sira kona-ba Maromak nia reinu, no nia kura ema neʼebé moras.

Lokraik neʼe, ninia dixípulu sira hakbesik nia no hatete: ‘Atu kalan ona, no rai neʼe fuik. Haruka ema sira atu bá sosa ai-han iha aldeia besik iha neʼe.’

Jesus hatán: ‘Sira lalika bá dook. Imi mak fó buat ruma ba sira atu han.’ Hateke ba Filipe, Jesus husu: ‘Iha neʼebé mak ita bele sosa ai-han neʼebé toʼo atu fó-han ba ema hotu iha neʼe?’

Filipe hatán: ‘Atu sosa ai-han hodi ema ida-idak bele han uitoan, neʼe mós sei presiza osan barak tebes.’ André mós koʼalia: ‘Labarik oan ida iha neʼe iha paun fuan lima no ikan rua. Maibé neʼe mós latoʼo ida atu fó-han ba ema hotu iha neʼe.’

Jesus hatete: ‘Haruka ema sira atu tuur iha duʼut leten.’ Hafoin, nia fó obrigadu ba Maromak, no hahú silu ai-han neʼe rohan ba rohan. Tuirmai, dixípulu sira fahe fali paun no ikan ba ema hotu. Iha neʼebá, iha mane naʼin-5.000, no mós feto no oan rihun ba rihun. Sira hotu han toʼo bosu. Kuandu dixípulu sira halibur fali ai-han neʼebé resin, iha luhu hamutuk 12 nakonu!

Agora, Jesus haruka dixípulu sira saʼe ró atu hakur Tasi Galileia. Iha kalan neʼe, anin-fuik huu makaʼas, no laloran baku bá baku mai ró ida-neʼe. Dixípulu sira taʼuk tebes. Hafoin, kalan boot ona, sira haree ema ruma laʼo tesik iha bee leten hodi hakbesik sira. Sira hakilar ho taʼuk, tanba sira la hatene saida mak sira haree daudauk.

Jesus hatete: ‘Keta taʼuk. Haʼu mak neʼe!’ Sira sei nafatin la fiar. Nuneʼe, Pedro hatete: ‘Naʼi, se Ita-Boot duni, hatete mai haʼu atu laʼo iha bee hodi bá toʼo Ita-Boot.’ Jesus hatán: ‘Mai!’ Pedro tun husi ró no laʼo iha bee leten! Tuirmai, nia sai taʼuk no hahú mout, maibé Jesus salva nia.

Iha tempu seluk, Jesus fó-han tan ba ema rihun ba rihun. Tempu ida-neʼe, nia fó-han ho paun fuan hitu no ikan kiʼik balu. No dala ida tan, iha hahán barak ba ema hotu. Diʼak tebes haree oinsá mak Jesus tau matan ba ema, loos ka lae? Kuandu nia ukun nuʼudar Maromak nia liurai, ita sei nunka hanoin barak kona-ba buat ida!