ATAKANU ibore yenerono. Aari Yokana Ekebatisan. Mam Kerodia, aberu naka ekabaka, akoto nges. Abu kopedo ainakin ekabaka etubori akou nak Yokana.

Kiira Yesu ngun, abu kiturur noi. Kolot aibois na ajaikinor bon. Konye kotupasi itunga nges. Nakeanyunia Yesu ikodeta, kitim kes. Aso kiner kakes nuka ajakanut naka Edeke, kitangaleu lukadekake kec.

Ebong kopotu ikekesisiak nejai ngesi kotemasi atiar: ‘Atuboro isawan, esil aibois na. Kotwar itunga tetere epedorete egwelet inyamat kec kocaloi lueapiete.’

Kobongok Yesu: ‘Mam kes enyounete. Koinakis yesi kes lunyaman.’ Kibelokin Yesu aite Pilip, kingit atiar: ‘Aibo ipedoria oni egwelet inyamat luedolete aitanyam itunga lukere?’

Kobongo Pilip: ‘Eyangari isirigin luipu egwelet inyamat luedolete tetere nginitunganan enyami idis.’ Kotema Anderea atiar: ‘Isapat yenibwokit inyamat wok, ejaas kimugatin ikany kaagaria aarei. Konye mam eapiarete adolere itunga lu kere.’

Kobala Yesu: ‘Kisiboikis itunga kwap anya.’ Kosodi aisialamikin Edeke kanu inymat, kogeuni abilibil kesi toma atutubena. Etupakini, kokorakis ikesisiak itunga kere emugati ka agaria. Ejaas ikiliok 5,000, ka ilukumin luipu luka angor ka idwe. Konyamata kere kimonikinos. Kosodete kotukonokis ikesisiak atutubeta nuesalito, kilelebata ibukito 12!

Kodokas isisiak luka Yesu ataker alosit okekwa juwai naka angolol Galilaya. Kware ogeu angolol akulaun kanuka aikut naka ekwam loepol, kijangijang ataker. Kokuriakaros ikesisiak noi. Kosodi, kiding kware, koanyut itunganan itorit angolol abunore nejaas kesi. Kiworoto kanuka akurian, naarai mam ejanete inyobo anyutu kesi.

Kobala Yesu: ‘Sirikikuriakaros. Eong lo!’ Eroko kes ecamuna nu. Aso kotema Petero atiar: ‘Arai teni erai jo ngol, Ejakait kicorakinai kabu ne ijai kokuju akipi.’ Kobongok Yesu atiar: ‘Bia!’ Kodoku Petero kosodi alosit kakipi! Kokurianar ido ogeu alumor, konye oyu Yesu nges.

Ekaulo, kitanyam bobo Yesu ilukumin luka itunga. Kapak kana kiswama ngun kede imugatin ikanyi kaarie ka agaria nuikidioko. Ido bobo kimonikinos itunga kere. Mam kereka ejokuna epone loepodokinitor Yesu itunga? Kipuga kwape ekabaka loka Edeke, Mam bobo oni kipodokin idisibore kere!