KWAGH u cieryol kpishi je e̱r. I wua Yohane u Eren Batisema. Herodia, kwase u tor, yange soo un ga. Man a fatyô u eren sha e̱r tor una na zwa sha u i̱ tôndo ityough ki Yohane kera yô.

Shighe u Yesu ungwa kwagh ne yô, ishima vihi un kpishi je. A yem ken taaikyôngo un tswen. Kpa ior dondo un. Shighe u Yesu nenge a ikpelaior yô, mhôônom kôr un a ve. Nahan a ôr ve kwagh u tartor u Aôndo, shi a bee mbauangev vev angev.

Iyange va been yô mbahenen nav va hen a na va kaa a na er: ‘Shighe kar hegen, man or kpaa nan ngu hen ijiir ne ga. Yô na ior gbenda ve̱ yem ken angarev ve̱ za yam kwaghyan.’

‘Gba u vea yem ga,’ Yesu na mlumun nahan. ‘Na nen ve kwaghyan ve̱ ya.’ Gem hen Filibu yô, Yesu pine un er: ‘Ka hana se fatyô u yamen kwaghyan u una kuma u se na ior mban ciilii?’

‘A gba u a vihi inyaregh kpishi sha u yamen kwaghyan sha er hanmaor nana zua a ivulugh kpeghee yô,’ Filibu na mlumun nahan. Anderia man ôr kwagh kaa er: ‘Wanakiriki u a lu a kwaghyan wase ne, ngu a ikpenbredi itian man ishu ihiar. Kpa ia fatyô u kuman sha ci u ior mban cii ga.’

Yesu kaa er: ‘Ôr ior mbara ve̱ tema inya sha adeghatoho.’ Tsô a sugh Aôndo sha ci u kwaghyan la, man a hii u coon un keregh avur avur. Been kera yô, mbahenen man ve ka̱r bredi man ishu la hen ior mbara cii. Nomso mbaiorov tseegh lu iyenge 5,000, man shi kasev kua mbayev mbakiriki ve lu udubu udubu. Ve cii ve ya zan zan kuma ve. Man shighe u mbahenen kohol avur a a shi la yô, akese 12 iv poo!

Hegen Yesu kaa mbahenen nav cii ve nyôr shin tso sha u vea per Zegemnger u Galilia yô. Tugh mbu il yô ijeverahumbe i̱ va, tsô iyuhwa-mnger gba daase a tso yemen keen man keen. Mciem haa mbahenen iyol kpishi. Tsô, ken atôutu, ve nenge a or nan lu zenden van sha mnger hen ape ve lu la. Ve ngor sha mcie, sha ci u ve fa kwagh u ve̱ lu nengen a mi la ga.

‘De cie nen ga,’ Yesu kaa a ve nahan. ‘Ka mo!’ Nahan kpaa ve na jighjigh ga. Nahan Peteru kaa er: ‘Aluer ka we mimi je yô, Tere, kaam m̱ zende sha zarmnger m̱ va hen ape ú lu la.’ Yesu kaa er: ‘Va!’ Man Peteru due zende sha zarmnger! Tsô mciem haa un iyol man a hii u miren, kpa Yesu yima un.

Ken hemen yô, Yesu shi na ior udubu udubu kwaghyan. Kwa ne di yô a er kwagh ne sha ikpen bredi itiankarihiar man ishu kpeghee tseegh. Man shi kwa ne kpaa kwaghyan lu kpishi sha ci u ior cii. Ka kwagh u kpilighyol sha gbenda u Yesu veren ishima sha ior ne ga he? Shighe u Aôndo una va ver un tor yô kwagh a kera za se iyol mayange ga!