93-нҗи хекая

Иса көп адамлары доюряр

ГОРКУНЧ вака болды. Исаны сувда чокундыран Яхяны яңыҗа өлдүрдилер. Патышаның аялы Хиродия Яхяны йигренип, онуң келлесини алдыртды.

Иса муңа гынанып, бир чола ере гидйәр. Адамлар хем онуң ызындан баряр. Иса адамлары гөрүп, йүреги аваяр. Ол Худайың патышалыгы барада гүррүң берип, сыркавлары сагалдяр.

Шол агшам шәгиртлери Исаның янына гелип: «Инди гич болды. Биз чола ерде. Адамлары гойбер, якындакы обалара гидип, өзлерине чөрек сатын алсынлар» дийди.

Эмма Иса олара: «Олар гитмесин, гайтам, сиз олара иймәге зат бериң» диййәр. Соңра Филипусдан: «Адамлары доюрмак үчин чөреги ниреден сатын аларыс?» дийип сораяр.

Филипус Иса: «Хер киме бираз чөрек етер ялы көп пул герек болар» диййәр. Шонда Андреас: «Чөрегимизи гөтерйән огланда бәш чөрек билен ики балык бар. Йөне шейле көп адама етмезмикә диййән?» диййәр.

Шонда Иса адамлара отуң үстүнде отурмагы буюряр. Иса Худая сагболсун айдып, чөреклери бөлүшдирйәр. Шәгиртлери болса чөреклери ве балыклары адамлара пайлаяр. Шол ере 5 000 саны эркек адам ве мүңден хем көп аяллар ве чагалар йыгнаныпды. Оларың хеммеси дойянчалар ийдилер. Шәгиртлер артып галан чөреклери йыгнанда, 12 саны себет доляр!

Соңра шәгиртлер Исаның хайышы боюнча Җелиле деңзинден гечмек үчин гайыга мүнйәрлер. Гиҗе гүйчли шемал туруп, гайыгы эйләк-бейләк чайкаяр. Шәгиртлер муңа гаты горкярлар. Даңдана голай, сувуң йүзүнде йөрәп гелйән адамы гөрйәрлер. Олар муңа дүшүнмән, горкудан яңа гыгырярлар.

Иса: «Бу мен, горкмаң» дийип, олары көшешдирйәр. Олар болса ынанмаяр. Шонда Петрус: «Я Реб, бу сен болсаң, маңа сувуң йүзи билен яныңа бармагы буюр» диййәр. Иса оңа: «Гел» диййәр. Петрус гайыкдан дүшүп, сувуң йүзүнде йөрейәр. Эмма бирденкә Петрус горкуп, сува гарк болуп башлаяр. Йөне Иса оны халас эдйәр.

Соңра Иса ене-де мүңлерче адамы доюряр. Бу гезек ол еди чөрек ве бирнәче балыҗак билен доюряр. Чөрек бу гезек хем хеммелере артыгы билен етйәр. Исаның адамлар барада эдйән аладасы сени хайран галдыранокмы? Худайың Патышалыгында биз хич задың аладасыны этмерис!

Матта 14:1—32; 15:29—38; Яхя 6:1—21.