Makani 93: Jesu Wasanina Bantu Banji
KWACITIKA cintu cimwi cibi. Ino-ino aawa Johane Mubbapatizi wajaigwa. Helodiya mukaintu wamwami tanaali kumuyanda pe. Wakapa kuti mwami aunyongole mutwe wa Johane.
Jesu amvwe makani aaya wausa kapati! Waunka alikke waakuluumuzya kubusena kutako cisabila. Pele bantu bamuccilila. Jesu abone nkamu yabantu, weetezyegwa. Aboobo wabaambila makani aa Bwami bwa Leza, alimwi wabaponya balwazi mbobaleta.
Ngeena mangolezya aayo basikwiiya bakwe baboola kuli nguwe, bati: ‘Kwasiya lino, alimwi muno muusyokwe. Kobaambila bantu baunke kutegwa bakaule zyakulya muminzi iili aafwiifwi.’
Jesu wavwiila wati: ‘Tabeelede kuunka pe. Amubape cakulya.’ Jesu wamulanga Filipo, kumane wabuzya kuti: ‘Nkuli nkotunga twaula cakulya cinji cikonzya kukkwana bantu boonse aaba?’
Filipo waingula kuti: ‘Cilakonzya kutola mali manji kuula cakulya cinji cakuti muntu aumwi akonzye kulya nokaceya.’ Andulu wati: ‘Ooyu mwana musankwa uunyamude cakulya cesu, ulijisi zinkwa zyosanwe answi zyobilo. Pele eeci tacikonzyi kukkwana bantu boonse.’
Jesu wati: ‘Amwaambile bantu bakkale abwizu.’ Amane Jesu wapaila akulumba Leza akaambo kacakulya, eelyo watalika kucikomoona. Kumane basikwiiya babapa cinkwa answi bantu boonse. Kuli basankwa basika ku 5,000 azyuulu azimbi zyabamakaintu abana. Boonse balya akukkuta. Basikwiiya nibabwezyelela zyalekwa, kwavwula mitaanga iili 12!
Kumane Jesu waambila basikwiiya bakwe kukkwela bwato kuti bazabuke Lwizi lwa Galilaya. Masiku kwabbubbula muwo uuyoosya, alimwi mayuwe abutonta bwato cakuti bwiile kukunauka. Basikwiiya bayoowa kapati! Eelyo akati amasiku babona muntu weenda atala lyameenda kazya kuli mbabo. Balila cakuyoowa, nkaambo tabacizyi ncobabona ikuti naa ncinzi.
Jesu wati: ‘Mutayoowi, ndime!’ Pele tabasyomi kuti ngonguyo. Aboobo Pita wati: ‘Ikuti naa Mwami nduwe ncobeni, ndiite ndiboole ooko kandeenda atala lyameenda.’ Jesu waingula wati: ‘Boola!’ Aboobo Pita waseluka mubwato watalika kweenda atala lyameenda. Kumane Pita watalika kuyoowa eelyo watalika kubbila, pele Jesu wamufwutula.
Kuzwa waawo, Jesu alimwi wasanina maunda-maunda aabantu. Aciindi aawa wabasanina azinkwa zili ciloba atuswi tusyoonto. Alimwi kwaba cakulya cikkwana bantu boonse. Hena tacikkomanisyi Jesu mbwabalanganya bantu? Aakulela kali mwami wa Leza, taku zintu nzyotuya kubula.
Matayo 14:1-32; 15:29-38; Johane 6:1-21.
Mibuzyo
- Ncintu nzi cibi cacitika kuli Johane Mubbapatizi, alimwi buti Jesu mbwaalimvwa kuli ceeci cacitika?
- Mbuti Jesu mbwaabasanina bantu banji aabo bamuccilila, alimwi ncinji buti cakulya cacaala?
- Nkaambo nzi basikwiiya ncobayoowa masiku, alimwi ncinzi cacitika kuli Pita?
- Mbuti Jesu mbwaakasanina maunda-maunda aabantu kuciindi cabili?
- Nkaambo nzi ncociya kubotela Jesu aakulela nyika kali Mwami wa Leza?
Mibuzyo aimwi
- Bala Matayo 14:1-32.
Mbuti cibalo ca Matayo 14:23-32 mbocitondezya bwini mbwaakabede Pita?
Mbuti Magwalo mbwaatondezya kuti Pita wakasima akuti wakacileka kucita zintu cakutayeeya? (Mt. 14:27-30; Joh. 18:10; 21:7; Inc. 2:14, 37-40; 1 Pita 5:6, 10)
- Bala Matayo 15:29-38.
Mbuti Jesu mbwaakatondezya bulemu kucakulya cakumubili cakazwa kuli Bausyi? (Mt. 15:37; Joh. 6:12; Kol. 3:15)
- Bala Johane 6:1-21.
Mbuti Banakristo sunu mbobakonzya kuccilila cikozyanyo ca Jesu cakupa bulemu kumfwulumende? (Joh. 6:15; Mt. 22:21; Balo. 12:2; 13:1-4)
