LU LILAKGAPUTSA tuku lalh. Makgnika Juan tiku xMununan. Herodías, xpuskat mapakgsina, nixʼakxilhputun Juan. Chu Herodías tlawalh pi mapakgsina xwa kapixchukuka.

Akxni Jesús katsilh pi makgnika Juan tiku xMununan lilipuwan. An xakstu anta niku niti wi. Pero kristianos stalanikgoy. Akxni Jesús kaʼakxilha umakgolh lhuwa kristianos kalakgalhaman. Wa xlakata kalixakgatliy xlakata xtamapakgsin Dios chu kamapaksay tiku xtatatlakgoy.

Tama kilhtamaku xtamakgalhtawakgen lakgminkgolh chu wanikgoy: Ay kakgotanunitta chu unu nitu anan. Kakawani kristianos kaʼankgolha xlakata tlan naʼankgoy tamawakgoy tuku nawakgoy anta klaktsu kachikinin nema lakatsu wilakgolh.

Jesús wan: Nixlakaskinka naʼankgoy. Wixin kakamaxkitit tuku nawakgoy. Chu Jesús kgalhskin Felipe: ¿Niku tlan xtamawaw lhuwa taway xlakata nawayankgoy putum uma kristianos?

Felipe kgalhtinan: Xlakata tlan natamawayaw taway, lhuwa tumin natamaklakaskin chu nipara katikaʼakchanilh. Andrés wan: Uma kgawasa kaj makkitsis kaxtalanchu chu tantiy skiti limin nema akinin nawayaw. Nikatikaʼakchanilh putum umakgolh kristianos.

Jesús wan: Kakawanitit putum kristianos katawilakgolh ksakgat. Chu Jesús maxki tapaxtikatsinit Dios xlakata taway chu laktsu laktsu tsukulh tlaway kaxtalanchu chu skiti. Xtamakgalhtawakgen kamaxkikgoy putum kristianos kaxtalanchu chu laktsu skiti. Xwilakgolh akgkitsis mil lakchixkuwin chu akglhuwa mil lakpuskatin chu laktsu kaman. Putum wayankgolh chu kgalhkgaskgolh. ¡Chu akxni xtamakgalhtawakgen Jesús makikgolh tuku xʼakgataxtunit takgatsilh akgkutiy canastas!

Chu Jesús tlaway pi xtamakgalhtawakgen katanukgolh kʼakgtum barco xlakata natitaxtukgoy kpupunu xalak Galilea. Tama katsisni tsukulh unan chu senan, chuchut xmatsuwi barco anu anu xlin. Xtamakgalhtawakgen Jesús snun pekuankgoy. Akxni tama katsisni akxilhkgolh pi wi tiku xkalakgama chu xkgalhni chuchut xtlawama. Snun pekuankgolh xlakata nikatsikgoy tuku xʼakxilhmakgolh.

Nikapekuantit akit Jesús kawani. Xlakan nila xmakanajlakgoy. Wa xlakata Pedro wan: Komo xlikana wix Jesús kakiwani kaklakgan anta niku wila. Jesús kgalhti: ¡Katat! ¡Chu Pedro lakgan chu tsukulh tlawan xkgalhni chuchut! Akxni xʼama, pekualh chu tsukulh lakgtsankgay kchuchut, pero Jesús makgtayalh.

Titaxtulh kilhtamaku Jesús kamawipa akglhuwa mil kristianos. Chu kaj xkgalhi maktujun kaxtalanchu chu ni tanlhuwa laktsu skiti. Chu kaʼakchanilh putum kristianos. ¡Lu lipaxuw akxni katsiyaw la Jesús kamakgtayalh kristianos! ¡Akxni namapakgsinan nitu katililakgaputsaw!